رزگار حەمید شەریف

ل سەر دەمێ ترامپ ١ (٢٠١٧-٢٠٢١) ئەمریکا پشتگیریا رێفراندۆما سەربەخۆیا هەرێما کوردستانێ ٢٠١٧ نەکر و کوردێن باشور پشت گوه ئاڤێتن. ل ٢٠١٨ ئەمریکا پشتی تەلەفۆنا سەرۆک کۆمارێ تورکیا و ترامپی، گلۆپا کەسک بۆ تورکیا هاتە هلکرن و عەفرین  و دەڤەرێن دەور و بەر هاتنە داگیرکرن. ئایا ترامپ ٢ دێ بۆ کوردان باش بیت؟؟

ب دەرچوونا ترامپ ٢، ئەورۆپا بیە تازی و شینی، پوتین کێکا خوەشیێ خوار، سەرۆک کۆمارێ تورکیا حەبکەک سەرئێش خوار و نڤێژا خێر و خوەشیێ ژیک کر و نەتەنیاهۆ “ وکالە العامە” یا ترامپی ل رۆژهەلاتا ناڤین وەرگرت و محەمەد بن سەلمانێ سعودی کرە جێگرێ خوە و شێخێن خەلیجی داوەتا عیونی کرن و مەلایێن ئیرانێ هاوار کرن و گۆتن یا علی و جەلتە لێدان و کورد ل ژوورا “انعاش” نە.

ئەگەر چ هێرشێن مەزن ل سەر سەربازگەه و سەفارتێن ئەمریکی و کریارەکا تیرۆریستیا مەزن ل ناڤخوەیێ ئەمریکا نەئێتە کرن، سیاسەتا ترامپ ٢ دێ بەردەوامیەک یا ترامپ ١ بیت. نەتەنیاهو وەکیلێ ترامپە و دێ ب کەیفا خوە کەڤیت و دەست و پی و چەنگێ ئیرانێ بەردەوام ل عێراق و یەمە ن و لوبنان و سوریا شکێند و شەری بتە ژوورا نڤستنێ یا مەلایێن ئیرانێ. راستە ترامپی پەیوەندیەکا باش دگەل ئەردوگانی هەیە، لێ نەتەنیاهو کۆ ژ ٦.١٠.٢٠٢٤ ڤە وەکیلێ ویە ژ رەفتارێن توند یێ تورکیا ئاکەپە بەرامبەر ئیسرائیل نەرازیە و دێ پشتگیریا کوردان بکەت ل بەرامبەر پشتگیریا تورکیا بۆ حەماس و گروپێن دژبەرێ ئیسرائیل.

پشتی ئەمریکا شکەستنێن مەزن ل ئەفغانستان و عێراقێ ئانینە، ئێدی ئەمریکا نەڤێت بچیتە ناڤ شەرێن بێ دوماهیک ل رۆژهەلاتا ناڤین و جوداهی نینە کو ترامپ یان دێمۆکراتیەک بابا سەرۆک. ترامپ ژیک دگەل سەقامگیرئ و ئارامیا ڤێ دەڤەرێ یە، داکو دیسان پۆستالێن ئەمریکیا نەڤەگرن رۆژهەلاتا ناڤین و پارەیەک خەیالی بێ فەیدە وەک جاران ب مەزێخن.

ئەمریکا ل ٢٠١٧ پشتگیریا رێفراندۆما هەرێمێ نەکر، ژ بەر کو وان دیت ئەگەر کوردێن عێراقێ داخوازا سەربخوەیێ بکەن، دێ کوردێن پارچێن دن ژیک ل سرا سەکن بۆ ڤێ داخوازێ و دێ وەسا بنە ئەگەرێ نە سەقامگیری و ئالوزی و شەران و دڤێت دیسان ئەمریکا سەربازێن خوە بینتە دەڤەرێ. ل رۆژئاڤا ژیک کوردان گوهێ خوە نەدانە شیرەتێن ئەمریکا کو بەردەوام دگۆتێ خوە ژ رەسمێ ئوجەلان و هێمایێت پ ک ک دوور بێخن ژبەر حەساسیا تورکیا کو ئەندامەک گرنگ یێ ناتۆ بی.

ئەمریکا دێ ل سەردەمێ ترامپ ٢ ژیک هاریکاریا ئێکگرتن و رێفۆرما کەت ل ناڤ هێزێن پێشمەرگەی و شەرڤانان ل رۆژئاڤایێ کوردستانێ داکو داعش سەرهلنەدت. ئەمریکا پشتگیریا هەرێما کوردستانێ دکەت دچارچووڤێ عێراقەکا ئێکگرتی و سەقامگیردا و ل سالا ٢٠٢٥ دێ مەزنترین قونسولیا خوە کو ب بهایێ 80 ملیۆن دۆلاران هاتیە چێکرن ڤەکەت  ب زێدەتر ژ 5.000 کارمەند و زێرەڤانان و ژبەر پاراستنا ژیانا ڤان کارمەندان ژیک هەرێما کوردستانێ دێ گرنگتر بیت و هەروەسا ژ بەر وان فشارێن سەر دەرکرنا هێزێن ئەمریکا هەیە، دێ ئەمریکا تەواجودا بنگەهێ سەربازیێ خوە یا ل حەریرا ب هێزتر و جێگرتر کەت.

نەتەنیاهو دەست ب گهورینا نەخشەیا رۆژهەلاتا ناڤین کریە و ئەگەر کورد ناف مالا خوە رێک بێخن و ب شارەزایی سەردەریێ دگەل ڤان روودانێن نوو بکە دێ شێن ژ بلی پاراستنا ڤان دوو کیانێت خوە، زێدەتر ماف و خاکێ خوە وەرگرن. دبپێنج سالێن بێت دا ب فەرمی دەولەتەک ب ناڤێ سوریا نامینت و کورد دێ بنە کیانەک سەربخوەتر و ب هێزتر ئەگەر سەرەدەریەکا باشتر بکەن. دەولەتێن جیرانێ مە ژ ڤان مەترسیا زوو حەسیانە و لەوا لەز لەزا وان خوە نێزیک ئێک بکەن و بەحسا پرۆسا ئاشتی دکەن.