گاڤ

کۆمکارا عەرەبی، ب توندی گەفێن ئسرائیلێ ل سەر ئیراقێ شەرمزار کرن و گۆت: دێ نامەیەکێ سەبارەت ڤێ چەندێ بۆ ئەمیندارێ گشتی یێ نەتەوەیێن ئێکگرتی هنێرین.

کۆمبوونا کۆمکارا عەرەبی، پشتی داخوازییا ئیراقێ هاتە کرن و تێدا گەفێن ئسرائیلێ ل سەر ئیراقێ هاتنە گۆتوبێژکرن. پاشی راگەهاندنەک سەبارەت ناڤەرۆکا کۆمبوونێ هاتە بەلاڤکرن و تێدا هاتیە نڤیسین: "گەفێن ئسرائیلێ یێن ل سەر ئیراقێ ب توندی شەرمزار دکەین."

کۆمکارا عەرەبی هەروەسا داخواز کر، هەر زوی رێکارێن بلەزن و پێدڤی ل بەرانبەری ڤێ رەوشا ئالۆز بهێنە وەرگرتن. دا کو ئارامی و ئاشتییا دەڤەرێ نەکەڤیتە مەترسییێ.

پێشتر، وەزیرێ دەرڤە یێ ئسرائیلێ، سەبارەت هێرشێن چەکدارێن ئیراقێ ل سەر وی وەلاتی، نامەیەک دابوو نەتەوەیێن ئێکگرتی و جڤاتا ئاسایشا ناڤدەولەتی. تێدا داخواز کربوو، فشار ل ئیراقێ بهێنە کرن، دا کو هێرشێن چەکداران براوەستینیت. هەروەسا ئەمریکایێ ژی، بۆ بەرپرسێن ئیراقێ راگەهاندبوو کو ئەگەر ئیراق هێزێن چەکدار کۆنترۆل نەکەت ئێدی ئەو نەشێن رێکێ ل هێرشێن ئسرائیلێ بۆ سەر وەلاتێ وان بگرن. وەزیرێ دەرڤە یێ ئیراقێ ژی، راگەهاندبوو: ئسرائیلێ ب نامەیەکێ گەف کرینە و گەفێن وێ ژی د جددی نە.