گاڤ

سەنتەرەکێ مافێن مرۆڤی یێ ستراتیژی یێ ئیراقێ رەت دکەت سەرژمێری ببیتە ئەگەرێ زێدەبوونا کورسییێن پەرلەمانێ ئیراقێ و رادگەهینیت: دەستوور رێ ب وی کاری نادەت.

ل گۆرەی دەستوورێ ئیراقێ، پێدڤییە هەر 100 هزار وەلاتییێن ئیراقێ، نوینەرەک ل پەرلەمانی هەبیت، لێ ژبەر کو پێشتر چ ئامارێن فەرمی دەربارەی ژمارەیا وەلاتییێن ئیراقێ نەبوون، ژمارەیا وەلاتییان ب 32 ملیۆن و 900 هزار کەسان هاتییە خەملاندن و ل گۆرەی وێ ژمارەیا وەلاتییان، ژمارەیا کورسییێن پەرلەمانێ ئیراقێ هاتییە دیارکرن کو 329 کورسینە ئانکو بۆ هەر 100 هزار وەلاتییان کورسییەکا پەرلەمانی.

فازل غەراوی، سەرۆکێ سەنتەرێ مافێن مرۆڤی یێ ستراتیژی د بەیانەکێ دا راگەهاند: هەرچەندە د سەرژمێرییێ دا هاتە دیارکرن کو ژمارەیا وەلاتیێن ئیراقێ 45 ملیۆن و 300 هزار کەسە، لێ ئەڤە نابیتە ئەگەر ژمارەیا کورسییێن پەرلەمانێ ئیراقێ ژ 329 کورسییان بۆ 453 کورسییان زێدە ببیت.

دەربارەی ئەگەران، غەراوی دبێژیت: ل گۆرەی دەستوورێ ئیراقێ، پێدڤییە ژمارەیا وەلاتییێن ئیراقێ ب ئامار بهێتە دیارکرن نەکو ب سەرژمێری و ئەڤا ل ئیراقێ هاتییە کرن سەرژمێری یە نەکو ئامار و جوداهییەکا مەزن د ناڤبەرا وان دا هەیە، د ئامارێ دا نەتەوە و ئایین و چەندین تایبەتمەندییێن دی هەنە کو د سەرژمێرییێ دا نینن.