گاڤ

ئەڤرۆ وەزارەتا دەرڤە یا ئیراقێ پێشوازی ل رێککەفتنا لبنان و ئسرائیلێ یا راوەستاندنا شەڕی کر و کۆمارا ئیسلامی یا ئیرانێ خۆشحالییا خۆ ب راوەستیانا هێرشێن ئسرائیلێ ل دژی لبنانێ دیارکر.

وەزارەتا دەرڤە یا ئیراقێ ئەڤرۆ د بەیانەکێ دا پێشوازی ل رێککەفتنا لبنان و ئسرائیلێ یا راوەستاندنا شەڕی کر و د بەیانەکێ دا راگەهاند: ئیراق هیڤیخوازە ئەڤ رێککەفتنە بۆ گەلێ لبنانێ ببیتە ئەگەرێ سنۆردارکرنا توندوتیژی و وێرانییێ و هاریکارییێن نێڤدەولەتی بۆ لبنانێ هەبن.

وەزارەتا دەرڤە د بەیانا خۆ دا دیارکرییە: ئیراق ئامادەیە بەردەوامییێ بدەتە هاریکارییا گەلێ لبنانێ و هیڤیخوازە گاڤێن بلەز و رژد بۆ بدویماهیئینانا کۆمکوژییێن غەزە ژی هەبن.

هەر دەربارەی رێککەفتنا لبنان و ئسرائیلێ، ئیسماعیل بەقائی، پەیڤدارێ وەزارەتا دەرڤە یا ئیرانێ راگەهاند: ئیران پێشوازییێ ل راگرتنا هێرشێن زەیۆنی ل سەر لبنانێ دکەت و پشتەڤانییا خۆ بۆ گەلێ لبنانێ و مقاومەیا ئیسلامی دوپات دکەت.