گاڤ

ژبەر گەفێن ئسرائیلێ حکومەتا ئیراقێ دەست ب لڤینێن سیاسی و دپلۆماسی کر و ئەڤرۆ سەرۆکوەزیرێ ئیراقێ ب سەرەدانەکا فەرمی گەهشتییە ئسپانیا.

سەرۆکوەزیرێ ئیراقێ ب سەرەدانەکا فەرمی گەهشییە ئسپانیا، ل گۆرەی زانیاریان مەرەم ژ سەرەدانا سەرۆکوەزیرێ ئیراقێ، کۆمکرنا پشتەڤانییا وەلاتێن رۆژئاڤایە ل هەمبەر گەفێن هێرشکرنێ یێن کو ڤێ داویێ ئسرائیل ل ئیراقێ دکەت.

ئۆفیسا سەرۆکوەزیرێ ئیراقێ بەلاڤکر، محەمەد شیاع سوودانی، سەرۆکوەزیرێ ئیراقێ ئەڤرۆ رۆژا چارشەمبی لسەر داخوازا پیدرۆ سانشێز هەڤکیڤێ خۆ یێ ئسپانی قەستا وی وەلاتی کر ژبۆ پشکداریکرنێ د کۆنگرەیێ بەرسڤدانا مرۆڤی یا بلەز ل غەزە.

ل گۆرەی زانیارییان، سوودانی ل ئسپانیا دێ ل گەل ئێکەتییا ئەورۆپا بابەتێ گەفێن هێرشکرنێ ئەوێن ئسرائیل ل ئیراقێ دکەت گۆتۆبێژ کەت و دێ بزاڤێ کەت پشتەڤانییا وەلاتێن رۆژئاڤا ب دەست خوڤە بینیت کو ببنە رێگر ل هەمبەر وان هێرشێن دهێنە چاڤەرێکرن ئەوێن ئسرائیلێ لبەرە لسەر ئاخا ئیراقێ بکەت.

زانیاری هوسا دیار دکەن ژبەر گەفێن ئسرائیلێ حکومەتا ئیراقێ لبەرە بلەز دەست ب لڤینێن سیاسی و دپلۆماسی بکەت بەرەڤ کۆمەلگەها نێڤدەولەتی بچیت ب رێیا دەرگەهێن جودا ژبۆ کو گڤاشتنێن نێڤدەولەتی ل تەلئەڤیڤێ بهێن کرن و داکو چ هێرشێن سەربازی ل دژی ئیراقێ نەکەت و ژبەر هندێ سەرەدانا سوودانی بۆ ئسپانیا و کۆمبوونێن وی یێ چاڤەرێکری دێ دوپاتی ل وی بابەتی هێتە کرن کو حکومەتا ئیراقێ د نها دا ب بابەتەکێ گەلەک هەستیار دبینیت.

 ئەڤرۆ یەحیا رەسوول پەیڤدارێ فەرماندارێ گشتیێ هێزێن چەکدار یێن ئیراقێ راگەهاند، هێزێن ئیراقی د ئامادەباشییەکا تەمام دانە و بەرهەڤن بەرگریێ ل سەروەرییا ئیراقێ بکەن ل دژی هەر گەفەکا ژ دەرڤە و ئاشکرا کر: سوودانی سەرکردایەتیا هێزێن ئاسمانی خواستییە هەمی رێکاران ژبۆ پاراستنا ئاسمانێ ئیراقێ بگرنەبەر و ژ هەمی ئالیێن ئەمنی و هەوالگریی ژی خواستییە بەردەوام زانیارییان کۆمبکەن دناڤبەرا هەر 12 دەمژمێران ب رێیا راپۆرتەکێ ئەو بهێتە هایدار کرن.