گاڤ - تایبەت
ئێشەک د ناڤ مریشکێن پارێزگەها دهۆکێ دا بەلاڤبوویە و د هه‌یاما چل رۆژان دا بتنێ ل دو ده‌واجنان پترى سه‌د هزار مریشك مرینه‌، ئه‌نفلاوه‌نزا، سى ئار بى و ئاى بى ئێس ژ وان ئێشێن سه‌ره‌كى نه‌ یێن نوكه‌ مریشكێن دهۆكێ تووشبووینێ. 
حه‌جى ره‌مه‌زان شه‌ره‌فانى، جێگرێ كۆمه‌لا گاره‌ یا په‌له‌وه‌ران بۆ گاڤ راگه‌هاند: بتنێ د دو پڕۆژه‌یان دا د هه‌یاما نێزیكى 40 رۆژان دا پترى 100 هزار مریشكان مرینه‌ ئه‌گه‌ر ژى بۆ نه‌خۆشیێن ئه‌نفلاوه‌نزا، سى ئار بى و ئاى بى ئێس ڤه‌گه‌ڕاندینه‌ و دیاركر، رۆژانه‌ نێزیك 100 هزار مریشكان ل دهۆكێ دهێنە به‌رهه‌مئینان، لێ دهۆكێ بتنێ پێدڤى ب 50 هزاران هه‌یه‌.
هه‌روه‌سا ئاشكراكر، هاتنا مریشكا بیانى و به‌ستیگرتى زیانه‌كا مه‌زن ب به‌رهه‌مێ ناڤخۆ یێ دهۆكێ گەهاندییە و خه‌لكێ دهۆكێ ژى مریشكا ده‌واجنان ناخۆن و پتر یا به‌ستى گرتى بكاردئینن.
جێگرێ كۆمه‌لا گاره‌ هه‌روه‌سا دیاركر، رێكا به‌غدا گرتیه‌ و رێ ناهێته‌دان مریشكا دهۆكێ به‌ر ب مووسل و ناڤه‌ڕاستا ئیراقێ بچیت و گۆت: حه‌شدا شه‌عبى و بازرگان و حكومه‌تا ناڤەندى ئه‌گه‌رێن ڤێ کێشێ نه‌.
ل دۆر ئەگەرێن بەلاڤبوونا وێ ئێشێ، حه‌جى ره‌مه‌زانى بۆ گاڤ گۆت: ده‌رمان و ئالفێن ب مریشکا ناڤخۆ دهێنەدان د بێ كوالتى نه‌ و مریشكێ بهێز نائێخن و به‌رگرییا پترییا مریشكان ل پارێزگه‌ها دهۆكێ گه‌له‌ك لاوازه‌ و خۆ ل به‌ر ئێشان ناگرن.