شه‌ڕه‌كێ دژوار ل حه‌له‌بێ دهێته‌كرن
بەلاڤ بکە
گاڤ
ژێده‌ره‌كى ژ حكومه‌تا سوریا راگه‌هاند، هێزه‌كا پشته‌ڤانیێ بۆ پشته‌ڤانیكرنا سوپایێ سووریا گه‌هشتییه حه‌له‌بێن ئه‌ڤه هه‌ڤده‌مه كو ژێده‌رێن خۆ جهى دبێژن: تا نوكه چه‌كدارین ئۆپزسیۆنێ 50 گوند و باژێڕێن حه‌له‌ب و ئدلب كۆنترۆل كرینه و شه‌ڕه‌كێ دژوار دهێته‌كرن.
ئه‌ڤرۆ ئه‌ینیێ ژێده‌ره‌كى ژ حكومه‌تا سووریا بۆ ئاژانسا فرانس پرێس راگه‌هاند، هێزا پشته‌ڤانیێ بۆ پشته‌ڤانیكرن ل سوپایێ سوریا گه‌هشتیه حه‌له‌بێ، هه‌روه‌سا ئاشكراكر، شه‌ڕه‌كێ دژوار و توند دهێته‌كرن و شه‌ڕ به‌رده‌وامه، لێ هێشتا چه‌كدارێن ئۆپزسیۆنێ نه‌گه‌هشتینه باژێڕى.
وه‌زاره‌تا به‌رگریا سوریا د راگه‌هانده‌كێ دا به‌رسینگێ هێرشه‌كا دژوار یا گرۆپێن ئۆپزسییۆنا سووریا ل حه‌له‌بێ گرتیه و رێگرى ل پێشڤه‌چوونێن وان كریه.
زانیاریێن زێده‌تر دیاردكه‌ن، د شه‌ڕى دا هه‌ژمارا كوشتییان بۆ زێده‌تر ژ 240 كه‌سان زێده‌بوویه و ژێده‌رێن خۆجهى یێن سوریا ژى دبێژن: چار ئه‌ندامێن گرۆپێن ئۆپزسیۆنێ ژى هاتینه كوشتن.
ل گۆڕه‌یى ژێده‌رێن خۆ جهى یێن سوریا ئاماژه ب وێ یه‌كێ دكه‌ن تا نوكه گرۆپێن چه‌كدار یێن سه‌ر ب ئۆپزسیۆنا سوریا ڤه زێده‌تر ژ 50 گوند و باژێڕان ل حه‌له‌ب و ئدلبێ كۆنترۆل كرینه.
هه‌روه‌سا دیاركریه، پێشڤه‌چوونێن گرۆپێن چه‌كدار یێن ئۆپزسیۆنا سوریا ل پارێزگه‌ها حه‌له‌بێ ب سه‌ركردایه‌تییا گرۆپێ ته‌حریر ئه‌لشام ڤه به‌رده‌وامه و رێكا ناڤبه‌را دیمه‌شق و حه‌له‌بێ كۆنترۆل كریه و بتنێ دو كیلۆمتران ژ حه‌له‌بێ دوورن.
خویاكریه ژى، هه‌ر ئۆپزسیۆنێ رێكا ناڤبه‌را حه‌له‌ب و لادقیێ ژى داخستییه و شه‌ڕه‌كێ دژار ل وان جهان ژى دهێته كرن و ئۆپزسیۆن ب هێز شه‌ڕى دكه‌ت.
چارشه‌مبا بۆرى ته‌حریر ئه‌لشام ئۆپه‌راسیۆنه‌كا به‌رفره‌هـ ده‌ستپێكرییه و ب كێمى 10 پێگه‌هێن سوپایێ سوریا وێرانكرینه، حكومه‌تا سووریا ژى دبێژیت: ئه‌و رێ ناده‌ن و دێ د شه‌ڕى دا به‌رده‌وام بن.
به‌رى ئۆپه‌راسیۆن ده‌ستپێبكه‌ت، سوپایێ سوریا ب هاریكارییا رۆسیا هێرشێن ئاسمانى ل هنده‌ك ناوچه و ره‌خودۆرێن ئدلبێ كرن، كو ل ژێر ده‌ستهه‌لاتا ئۆپزسیۆنێ یه.
دێمترى بیسكۆف، په‌یڤدارێ كۆچكا سه‌رۆكایه‌تییا رۆسیا، دیاركریه، ئه‌وا ل حه‌له‌بێ دهێته‌كرن بنپێكرنا سه‌روه‌رییا سوریایه و پشته‌ڤانییا مۆسكۆ ژى بۆ سوریا پشتراستكر بۆ وێ یه‌كێ سه‌قامگێرى بۆ باژێرى ڤه‌گه‌ڕیت.
پشتى شه‌ڕێ ناڤخۆ یێ سوریا، رۆسیا پشته‌ڤانییه‌كا مه‌زن یا سوریا دكه‌ت و هه‌ر ژ سالا 2015ێ ده‌ستوه‌ردانێن سه‌ربازى كرن و پشته‌ڤانییا بشار ئه‌سه‌د، سه‌رۆكێ سوریا كر و هێرشێن ئاسمانى كرنه سه‌ر رێكخستنا تیرۆرستییا داعشێ و گرۆپێن ل دژى حكومه‌تا ئه‌سه‌دى راوه‌ستیاین و تا نوكه ژى ل سه‌ر هه‌لوه‌ستێ خۆ به‌رده‌وامه.
