گاڤ – تایبەت

بریارە دوسبە ئێکەم روینشتنا خۆلا شەشێ یا پەرلەمانێ کوردستانێ بهێتە کرن و ل گۆرەی یاسایێ، پێدڤییە دەستەیا سەرۆکاتییا پەرلەمانی د ئێکەم روینشتن دا بهێتە هەلبژارتن.

ب فەرمانا نێچیرڤان بارزانی، سەرۆکێ هەرێما کوردستانێ پێدڤییە دوسبە رۆژا دوشەمبی 2-12-2024ێ ل دەمژمێر 11:00 سپێدێ ئێکەم روینشتنا خۆلا شەشێ یا پەرلەمانێ کوردستانێ بهێتەکرن و ب تەمەنترین پەرلەمانتار دێ وەک سەرۆکێ پەرلەمانی ئێکەم روینشتن برێڤەبەت.

د. وەعدی مزویری، شیرەتکارێ پەرلەمانێ کوردستانێ دەربارەی خالێن یاسایی یێن گرێدایی ئێکەم روینشتنا پەرلەمانی بۆ گاڤ گۆت: د روینشتنا دوسبە دا، بەربژارێن سەرکەفتی یێن هەلبژارتنان دێ سویندا یاسایی خۆن و ل گۆرەی یاسایێ، پێدڤییە پشتی خوارنا سویندا یاسایی، دەستەیا سەرۆکاتییا پەرلەمانی بهێتە هەلبژارتن.

د ڤێ روینشتنێ دا سەرۆکێ تەمەنی یێ پەرلەمانی دێ دەرگەهێ خۆ بەربژارکرنێ بۆ دەستەیا سەرۆکاتییا پەرلەمانی ڤەکەت کو ژ سەرۆکێ پەرلەمانی، جێگرێ سەرۆکێ پەرلەمانی و سکرتێرێ پەرلەمانی پێک دهێن و پێدڤییە ئێک ژ هەرسێیان ژن بیت.

هەمی پەرلەمانتاران ماف هەیە خۆ بۆ وان پۆستان بەربژار بکەن. ئەگەر بەربژار یێ بێ هەڤڕک بیت، ئێکسەر دێ پۆستی وەرگریت. بۆ نموونە، ئەگەر بۆ پۆستێ سەرۆکێ پەرلەمانی کەسەک بتنێ بەربژار بیت، دێ سەرۆکێ تەمەنی یێ پەرلەمانی ئێکسەر وی راسپێریت کو ببیتە سەرۆکێ پەرلەمانی و دەنگدان ناهێتە کرن.

ئەگەر پتر ژ کەسەکی بۆ پۆستێن دەستەیا سەرۆکاتییێ بەربژار بن، دێ دەنگدان هێتە کرن و بەربژارێ پتر دەنگان دبەت، دێ پۆستی وەرگریت. ئەگەر دەنگێن دو بەربژاران هندی ئێک بوون، دێ دەنگدان د ناڤبەرا وان دا هێتە دوبارەکرن و کەسێ سەرکەفتی دێ پۆستی وەرگریت. ئەگەر د جارا دویێ ژی دا دەنگێن وان هندی ئێک بوون، دێ ب پشککێشان ئێک ژ وان پۆستی وەرگریت.

د. وەعدی مزویری، زێدەتر دەربارەی بابەتی دبێژیت: ئەگەر ئالیێن سیاسی پێک بهێن، دێ ل گۆرەی یاسایێ د روینشتنا دوسبە دا دەستەیا سەرۆکاتییا پەرلەمانی هێتە هەلبژارتن، لێ ئەگەر رێککەفتن نەبیت، دبیت د ڤێ روینشتنێ دا بتنێ پەرلەمانتارێن نوی سویندا یاسایی بخۆن و روینشتن ب دویماهی بهێت.