گاڤ

ئەندامەکا فراکسیۆنا پارتی بۆ گاڤ راگەهاند؛ کۆمبوونا ئەڤرۆ یا پەرلەمانێ ئیراقێ ژبەر رێکنەکەفتنا ئالییێن سیاسی بۆ سبەهی هاتە پاشخستن.

کاڤین شێخ سەعید، ئەنداما فراکسیۆنا پارتی ل پەرلەمانێ ئیراقێ بۆ گاڤ گۆت: سێ پرۆژەقانوونێن گریدای ئێک د کارنامەیا روونشتنا ئەڤرۆ یا پەرلەمانێ دابوون بریاربوو خاندن بۆ هەرسێکان بهێتە کرن و ل دوماهیێ دەنگدان لسەر بهێتە دان، پەرلەمانی خاندن ل سەر پرۆژەقانوونا ڤەگەڕاندنا مولکان بۆ خودانێن وان یێن رەسەن کر لێ رێ نەهاتەدان خاندن لسەر رەشنڤیسێ هەموارا دویێ یا یاسایا لێبۆرینا گشتی بهێته‌كرن ژبەر کو رێکنەکەفتن د ناڤبەرا ئالیێن سیاسی هەیە، ژبەر هندێ کۆمبوونا پەرلەمانی بۆ سوبەهی رۆژا سێ شەمبی هاتە پاشخستن.

ژ ئالیێ خۆ ڤە د. خەلیل غازی، ئەندامێ فراکسیۆنا پارتی ل پەرلەمانێ ئیراقێ بۆ گاڤ گۆت: فراکسیۆنێن کوردی ل پەرلەمانێ ئیراقێ دەربارەی دەنگدانێ ل سەر پێشنیاز و پرۆژە یاسایێن  گرێدایی بارێ کەسایەتی، لێبۆرینا گشتی، و ڤەگەڕاندنا مولکان بۆ خودانێن وان یێن رەسەن، دئێکگرتی نە و ل گۆرەی ئەو رێککەفتنا هەی، ئەگەر هەرسێ پرۆژە پێکڤە پەسەند نەبن، چ ژ وان پەسەند نابن.