گاڤ

وەزارەتێن دەرڤە و بەرگریێ یێن ئەمریکا، سەبارەت رەوشا سووریێ پەیام بەلاڤکرن. وەزارەتا دەرڤە دبێژیت: ئەسەد دیکتاتۆرە، وەزارەتا بەرگریێ ژی دبێژیت: گرۆپێ تەحریرولشام تیرۆرستە.

ماتیۆ میلەر، پەیڤدارێ وەزارەتا دەرڤە یا ئەمریکا، د بەیانەکێ دا راگەهاند: نابیت چ وەلات بێ بەرانبەر، پەیوەندییێن خۆ ل گەل ئەسەدی ئاسایی بکەن، ئەو دیکتاتۆرە و دەستێن وی ب خوینا گەلێ وی د سۆرن. هەڤپەیمانێن ئەمریکا، پەیوەندییێن خۆ ل گەل ئەسەدی ئاسایی دکەن، ئەڤە یا قەبویلکری نینە.

هەروەسا ئەو ژی دیارکرییە؛ دڤێت ئەسەد رەفتارێن خۆ بگوهۆریت، ئەگەر نە، قەبویل ناکەین چو ئالییێن هەڤپەیمانێن مە، پەیوەندییێن خۆ ل گەل ئاسایی بکەن.

ئەو ژی دیارکرییە؛ پێدڤییە رۆسیا و ئیران زێدەتر رەوشا سووریا ئالۆز نەکەن، مە دڤێت پێکهاتە و خەلکێ سڤیل یێ سووریێ بپارێزین، لەوما مە داخواز ژ وەلاتێن ناڤچەیێ کرییە کو کاریگەرییا خۆ بۆ کێمکرنا ئالۆزییان بکاربینن.

هەڤدەم وەزارەتا بەرگرییا ئەمریکا ژی راگەهاند: گرۆپێ تەحریرولشام، تیرۆرستە و ئەم د هەماهەنگییێ داینە دا کو داعش دیسان سەرهەلنەدەت.