دادڤانێن نێڤدەولەتی خۆ ژ گەڕا 13ێ یا خۆلا ستێرێن ئیراقێ ڤەکێشا
گاڤ
هەر ژبەر وێ هێرشا دوهی یا پشتەڤانەکێ یانەیا کەربەلا، 19 دادڤانێن نێڤدەولەتی و دادڤانێن پلە ئێک لێبۆرین خواست و راگەهاند: ژبەر وێ هێرشا ل سەر هەڤکارێ وان حسێن فەلاحی هاتییە کرن، ئەو بۆ بڕێڤەبرنا یارییێن گەڕا 13ێ ژ خۆلا ستێرێن ئیراقێ لێبۆرینێ دخوازن، رەوشا وان یا دەرۆنی باش نینە کو بشێن وان یارییان برێڤە ببەن، ئەو دێ ل نەخۆشخانێ سەرا هەڤکارێ خۆ دەن و تا ژ ساخلەمییا وی پشتڕاست نەبن، ڤەناگەڕنە ناڤ یاریگەهان.
پێشتر لژنەیا ناڤەندی یا ئێکەتییا تەپاپێی یا ئیراقێ راگەهاندبوو: رەوشا دادڤانێ نێڤدەولەتی حسێن فەلاحی یا باشە، میفراس بۆ سەرێ وی هاتییە گرتن و ئەو یێ بسلامەتە و هێرشکار هاتییە گرتن و نوکە لێکۆلین دبەردەوامن.
د وێ یارییێ دا، یانەیا دهۆک ب ئەنجامێ (2 – 1) ل سەر یانەیا کەربەلا سەرکەفتبوو.
ناسنامەیا کەسێ تابۆک ل سەرێ دادڤانێ یاریا دهۆک و کەربەلا دا ئاشکرابوو
ناسنامەیا وی کەسێ د یاریا دوهی یا د ناڤبەرا یانەیێن دهۆک و کەربەلایێ دا تابۆک ل هاریکارێ دادڤانی دای ئاشکرا بوو.
دوهی د چارچووڤەیێ خۆلا ستێرێن ئیراقێ دا، یانەیا دهۆک مێهڤانا یانەیا کەربەلا بوو، ل خۆلەکێن نێزیکی دویماهییا یارییێ، کەسەکی ژ ناڤ جەماوەرێ یانەیا کەربەلا، تابۆکەک ل سەرێ هاریکارێ دادڤانی دا و ب گرانی بریندارکر و ژبەر وێ یەکێ، دادڤانی یاری ب دویماهی ئینا و هاریکارێ وی بۆ نەخۆشخانێ هاتە ڤەگوهاستن.
ئاژانسا شەفەق ل گۆرەی ژێدەرەکێ وەرزشی یێ تایبەت ناسنامەیا وی کەسێ تابۆک هاڤێژتی ئاشکراکر و راگەهاند: ناڤێ وی کەسی جەعفەر کەریمە، ئەو هەلگرێ باجەکا رۆژنامەڤانی یە و هەر وی کەسی پار د ئێک ژ کۆنگرەیێن رۆژنامەڤانی یێن خیسۆس کاساس، راهێنەرێ ئیراقێ دا کێشە دروست کربوون.
یانەیا کەربەلا دەربارەی هێرشێ چ دبێژیت؟
دەربارەی بابەتی، کارگێرییا یانەیا کەربەلا ب ناڤێ خۆ و جەماوەرێ خۆ ئەو دەستدرێژی ب توندی ئیدانە کر و راگەهاند: یانەیا کەربەلا و جەماوەرێ وێ ژ وان جۆرە رەفتاران ددویرن و ئەو داخواز دکەن ئەو کەس ب توندی بهێتە سزادان.