وەزیرێ ساخلەمییێ: تاقیگەهێن حکومی نادەینە کەرتێ تایبەت
گاڤ
وەزیرێ ساخلەمییا هەرێما کوردستانێ رەت کر پرۆژەیەک هەبیت بۆ دانا تاقیگەهێن حکومی ب کەرتێ تایبەت و راگەهاند: ب رەنگەکێ گشتی چاکسازی د تاقیگەهـ و هۆلێن نشتەرگەرییان دا هاتینە کرن.
پێشتر وەسا بەلاڤ ببوو کو وەزارەتا ساخلەمییا هەرێما کوردستانێ پرۆژەیەک هەیە کو تاقیگەهێن حکومی بدەتە کەرتێ تایبەت و بهایێن پشکنینان ل سەر وەلاتییان گران ببن.
د. سامان بەرزنجی، وەزیرێ ساخلەمییا هەرێما کوردستانێ ئەڤرۆ د کۆنگرەیەکێ رۆژنامەڤانی دا راگەهاند: چ پرۆژە نینن تاقیگەهێن نەخۆشخانەیێن حکومی بچنە ب سەر کەرتێ تایبەت ڤە و یا د وی واری دا هاتییە کرن، بتنێ چاکسازییە د ناڤ تاقیگەهان دا.
وەزیرێ ساخلەمییا هەرێما کوردستانێ دیار ژی کر: ب رەنگەکێ گشتی، ژبلی تاقیگەهان، چاکسازی د ناڤ هۆلێن نشتەرگەرییان ژی دا هاتینە کرن، ب رەنگەکی پێشتر ل دەما نشتەرگەرییەک دهاتە کرن، ئەو چارچەڤا ل سەر تەختێ نەخۆشی، دهاتە شویشتن و جارەکا دی دهاتە بکارئینان، لێ نوکە سێتێ نەخۆشی هەیە، بۆ ئێک نەخۆش دهێتە بکارئینان و پاشی دهێتە هاڤێژتن.