ئیمانوێل ماکرۆن ل لبنانێ یە
گاڤ
سەرۆکێ فرەنسا ب سەرەدانەکا فەرمی ل لبنانێ یە و سەرەدان بۆ دوپاتکرنا پشتەڤانییا فرەنسا ل لبنانێ یە.
ئیمانوێل ماکرۆن، سەرۆکێ فرەنسا ئەڤرۆ ب سەرەدانەکا فەرمی گەهشتە لبنانێ و ژ ئالییێ نەجیب مێقاتی، سەرۆکێ حکومەتا کاربڕێکەر یا لبنانێ ڤە پێشوازی لێ هاتە کرن و دەربارەی سەرەدانێ، سەرۆکێ حکومەتا کاربڕێکەر یا لبنانێ راگەهاند: ماکرۆنی پشتەڤانییا خۆ بۆ حکومەتا کاربڕێکەر یا لبنانێ دوپات کرییە و پشتەڤانییا خۆ بۆ بجهئینانا بریارا ژمارە 1701 یا نەتەوەیێن ئێکگرتی دیارکرییە.
مێگاتی هەروەسا دیارکر: ئێک ژ بابەتێن کو ماکرۆن دشێت پشتەڤانییا لبنانێ تێدا بکەت، بجهئینانا بریارێن نەتەوەیێن ئێکگرتی یێن دەربارەی هێرشێن ئسرائیلێ ل سەر لبنانێ یە، ژبەر کو زێدەباری هەبوونا ئاگربەستەکا 60 رۆژی، هێشتا ئسرائیل بەندێن رێککەفتنا ئاگربەستێ بنپێ دکەت.
پشتی هەلبژارتنا جۆزێف عەونی وەک سەرۆکێ لبنانێ، ماکرۆن ئێکەم سەرۆکێ وەلاتەکی یە دچیتە لبنانێ و سەرەدان بۆ دیارکرنا پشتەڤانییا وی بۆ لبنانێ یە د وارێن سەروەری، سەقامگیری و چاکسازییا ئابۆری دا.