مەزلووم عەبدی: ب هەڤدیتنا ل گەل سەرۆک بارزانی کەیفخۆش بووم

بەلاڤ بکە

گاڤ

فەرماندارێ گشتی یێ هەسەدێ خۆشحالییا خۆ ب کۆمبوونا ل گەل سەرۆک بارزانی دیارکر و راگەهاند: ئەم ل سەر گرنگییا ئێکڕێزییا کوردان دهەڤڕابووین و ئارامییا دەڤەرێ بەرپرسیارییا مە هەمییانە.

مەزلووم عەبدی، فەرماندارێ هێزێن سووریا دیمۆکرات پشتی کۆمبوونا دوهی یا ل گەل سەرۆک بارزانی، ئەڤرۆ ل تۆرا جڤاکی یا ئێکس راگەهاند: ئەو ب هەڤدیتنا ل گەل سەرۆک مەسعوود بارزانی کەیفخۆش بوو و وان د کۆمبوونێ دا دانوستاندن ل سەر ڤان گوهۆڕینان کر یێن ل سوورییێ چێدبن و هەردو دهەڤڕابوون کو پێدڤییە دانوستاندن ل گەل شامێ بهێنە کرن و مافێن گەلێ کورد ب رەنگەکێ ئاشتیانە د سوورییێ دا بهێنە پاراستن.

عەبدی د پەیاما خۆ دا نڤیسییە ژی: مە تەکەز کر کو گرنگییا ئێکەتییا کوردان و ئارامییا هەرێمێ ب گشتی، بەرپرسیارییا مە هەمییانە و ئەم دێ ل گەل ئێک دهاریکار بین.

دوهی سەرۆک بارزانی ل هەولێرێ پێشوازی ل مەزلووم عەبدی، فەرماندارێ گشتی یێ هەسەدێ کر و پشتی کۆمبوونێ بارەگایێ بارزانی راگەهاند: دویماهی پێشهاتێن ئەمنی و سیاسی یێن سووریێ و چارچووڤەیێ گشتی یێ سەرەدەرییا ئالیێن سیاسی ل گەل رەوشا نوی یا سوورییێ، چەوانییا نیشاندانا هەلویستەکێ هەڤپشک یێ ئالیێن سیاسی یێن کوردی و پێدڤیاتییا وێ یەکێ ئالییێن سیاسی یێن کوردی بێی دەستوەردانا چ ئالییان و چارەنڤیسێ خۆ ب ئاشتیانە دیار بکەن و ئێکڕێزییا کوردان بۆ نەهێلانا دوبارەبوونا نەهامەتییان تەوەرێن سەرەکی یێن کۆمبوونێ بوون.

 

زێدەتر دەربارەی