بۆچی گرنگە حکومەت بهێتە پێکئینان؟
حەسەن فەتاح – رۆژنامەڤان
ل 20ی ئوکتۆبەرا چوویی، ئالیێن سیاسی ب بانگەشەیا بەرنامەیێ خۆ دەنگێن وەلاتیان د خواستن بۆ سەنگ و پێگەها خۆ ل پەرلەمانێ کوردستانێ، ئەو قووناغ دەرباز بوو کو خەلکی یا ل سەر خۆ کر و وەک پێدڤی پشکداری ڤێ پرۆسەیا دیمۆکراسی بوون، ب دیتنا من نوکە دەمە ئالیێن سیاسی ب تایبەتی یێن سەرکەفتی، ب تایبەتتر ژی پارتییا دیمۆکراتا کوردستانێ و ئێکەتییا نیشتمانی یا کوردستانێ، هەست ب وێ بەرپرسیارییا نیشتمانی بکەن و شرینییا دەنگێن خەلکی بدەن و لەزێ ل گاڤێن پێکئینانا کابینا دەهێ یا حکومەتا هەرێما کوردستانێ بکەن.
چ فاکتەرن کاریگەریێ دکەن؟
ئەڤ دەڤەرە کو ب جەرگێ رۆژهەلاتا ناڤین دهێتە نیاسین راستی هندەک گوهۆرینێن نوی یێن سیاسی بوویە و پێشهاتێن نوی ژی دچاڤەرێکرینە. پشتی هەلبژارتنێن سەرۆکاتییا ئەمریکا و جارەکا دی سەرکەفتنا دۆنالد ترامپی ژ کۆمارییان دهێتە چاڤەرێکرن، ویلایەتێن ئێکگرتی پێداچوونێ د هێلا بەرژەوەندیێن خۆ دا ل ڤێ دەڤەرێ بکەت. بەردەوامییا کێشەیێن هەولێر و بەغدا ب تایبەتی یێن دارایی، پاشی هەلبژارتنێن پەرلەمانێ عیراقێ د ئەڤ سالە دا، ئەڤ هەمی فاکتەرێن دەرڤەیی، دەڤەری و ناڤخۆیی ژی ئاماژەیێ ددەن کو پەککەفتن یان هەتا گیرۆبوونا پێکئینانا کابینا نوی یا حکومەتا هەرێما کوردستانێ د بەرژەوەندییا رۆل و پێگەها کیانێ هەرێما کوردستانێ و گەلێ وێ دا نینە.
بۆچی پارتی و ئێکەتی؟
چونکی ئەو دو ئالیێن سەرەکینە کو پێگەها جەماوەری، ئیداری، سەربازی و سیاسی ل ئاستا ناڤخۆ یا کاریگەرە و ژدەرڤە ژی پتر حساب بۆ دهێتە کرن و ئەڤە یا روونە کو هەر ئالیەک ژ وان بێی یێ دی بزەحمەتە بشێت حکومەتێ ئاڤا بکەت و حکومرانیێ بکەت، ئەگەر ئەڤە نەهێتەکرن ب نەرینا من مە چ سیناریۆیێن باشتر نابن، بەغدا ژی دێ ب ساناهی گۆلان ل سەر مە کەت، دێ بەهانەکێ ژی دەینە دەستی کو کیانێ مە بێخیتە ژێر پرسیار و گومان و گڤاشتنێ.