دیدارا مێژوویی یا سەرۆک مەسعوود بارزانی و جەنەرال مەزلووم عەبدی
پەروەر عزەت
دیدارا مێژووی یا د ناڤبەرا سەرۆک و مەرجەعێ کوردستانێ مەسعوود بارزانی و مەزلووم عەبدی ،فەرماندێ هێزێن سووریا دیموکرات و بتنێ کۆمبوونا دو تاکان نینە بەلکو لێک نێزیک بوونا رەمزێ دو بوچوون و لایەنێن مللەتێ مە یە .
د سەردەمەکی دا کو گەلێ کورد ل سەرانسەری ئاخا خۆ یا دابەش بووی، ری ب ری تەحەدیێن مەزن دبیت، ئەڤ کۆمبوونە پەیامەکا هیڤی بەخش بەرجەستە دکەت، بەلگەیە لسەر هێزا دیالۆگ و هاریکاری بۆ دەربازکرنا وان ئاستەنگان یێن ژ مێژە ئەم دابەش کرین.
مەزلووم عەبدی، نوینەرایەتیا ئازایەتی و ئیرادەیا وان کەسان دکەت کو بەرگریێ ژ ئازایەتی و پێکڤە ژیانێ دکەن ل رۆژئاڤایی، ب قوربانیدانا هزاران کەسان بناغە بۆ کۆمەلگەهەکا یەکسان و خۆسەر دانایی، سەرکردایەتیا وی هێمایێ روحەکا جاڤ نەترس یا وان کەسایە کو د وێرن دناڤ ڤێ تۆفان و رەوشا ئالۆزدا سپێدەیەکا نوی ب خەیالا خۆدا بینن.
ل بەرامبەر دا سەرۆک مەسعوود بارزانی وەکی کەسایەتیەکێ مەزن یێ مێژوویا کورد ئامادەیە ،دەولەتمەدارەک کو چەندین سالە هەلگرێ خەبات و خاستێن مللەتێ کوردە، خەبات و ئەزموونا وی یا مەزن هەرێما کوردستانێ بەرڤ دەستکەفتێن بەرچاڤ پێشڤە بریە. دیدارا وان یا ئەڤرۆ پرەکە بۆ نێزیکبوونا مللەتێ کورد و جوگرافیا کوردستانێ، ئەڤ دیدارە وێ چەندێ بۆ مە دیار دکەت، سەرەرای ئەو سنۆرێن مە دابەش دکەن، شوناسێ کورد دابەش نابیت، زمان کلتۆر و خەونێن مە یێن هەڤبەش دابەش نابن، جوداهیێن هەین دێ ل باوەشگرین و وەک سەرچاوەیەکێ هێزێ بکار ئینین.
هەروەسا ئەڤێ دیالوگێ کاریگەریەکا کویر یا لسەر ناڤچەیەکا بەرفرهه تر هەی ،پەیامەکا رون دیار دکەت کو گەلێ کورد د هەولا ئاشتی و ئۆتونۆمیدا، بتنێ چاڤدێرەکێ پاسیڤێ مێژووی نینە، بەلکی دارێژەرێ چالاک یێ چارەنڤیسێ خۆیە، داخازێ ژ کۆمەلگەها نیڤدەولەتی دکەت کو ڤێ ئێک گرتنێ وەکی بەرێ بناغەیێ ئاشتی و ئاسایشا ناڤچەیێ پشتگیریێ لێ بکەت
د دەمەکی دا ئەگەر ئەم هزرا خۆ د ڤی دەمێ گرنگ دا بکەین، بلا ل بیرامە بیت کو رێیا ل پێشییا مە دێ ب هەڤرکی مینیت، هێزێن دابەشبوون و ستەم و دەست تێوەردانن دەرەکی یێن د گەشە بوونێ دا، بەلێ ئەگەر پشتبەستنێ لسەر بنەمایێن ئێکگرتنێ و ئێکرێزیێ بکەین چ بەربەست نینن ئەم نەشێین بسەردا زالبین .
هیڤیخوازین ئەڤ دیدارە ببیتە خالا وەرچەرخانێ د خەباتا مە یا ب کۆمەل دا و ئیلهام بەخشبیت بۆ کوردان ل هەمی جهان، بۆ هندێ د سەر هەمی ناکوکیان دا پێکڤە کاربکەین بۆ داهاتویەکێ ئازاد و گەشتر.
هەروەکی ئەڤرۆ جەنەرال مەزلووم عەبدی و سەرۆک مەسعوود بارزانی نیشا مە دای هێزا مە یا د ئێک رێزیێ دا و هیڤی و ئومێدێن مە یێن د ئێکرێزیێ دا .