مەزلووم عەبدی بۆ کەنالێ ئەلعەرەبیە: چەکێن خۆ رادەستی ئیدارەیا نوی یا سووریێ ناکەین
گاڤ
فەرماندارێ گشتی یێ هێزێن سووریایا دیمۆکرات، راگەهاند: ئەم دژی وێ چەندێ مە کو ل سووریێ دو لەشکەر هەبن، لێ هەتا مافێن مە نەهێنە گەرەنتیکرن، چەکێن خۆ ژی رادەستی ئیدارەیا سووریێ ناکەین
مەزلووم عەبدی، فەرماندارێ گشتی یێ هێزێن سووریایا دیمۆکرات، د چاڤپێکەفتنەکێ دا ل گەل کەنالێ عەرەبییە راگەهاند: من داخواز ژ سەرۆک بارزانی کر بۆ راگرتنا هێرشێن تورکیا، ناڤبەینکارییێ دناڤبەرا مە و تورکیا دا بکەت. هەروەسا من ل گەل وی بەحسی چەوانییا راگرتنا هێرشێن تورکیا کر.
عەبدی گۆت ژی؛ سەرۆک بارزانی شیان هەنە هێزێن کوردی نێزیکی ئێک بکەت، هەرێما کوردستانێ کاریگەری ل سەر هێزێن سیاسی یێن ناڤچەیا مە هەیە، هەرێم و سەرۆک بارزانی گرنگیێ ددەنە ئێکرێزییا گەلێ کورد ل سووریا و چوونا وان ب ئێک شاندی بۆ دیمەشقێ، سەرۆک بارزانی سۆز دا کو ل سەر دانوستاندنێن خۆ ل گەل تورکیا بەردەوام بیت و من باوەری پێ هەیە، چونکی پەیوەندیێن باش ل گەل تورکیا هەنە.
سەبارەت هێرشێن ل سەر رۆژئاڤایێ کوردستانێ ژی عەبدی گۆت: رێکخراوێن ناڤدەولەتی رەوشا [رۆژئاڤایێ کوردستانێ] راپۆرتکریە و ئەڤە گاڤا ئێکێ یە کو د کۆربەند و ناڤەندێن ناڤدەولەتی دا، بهێتە بەحسکرن، تورکیا ب فەرمی بریار دایە، ژێرخانەیا [رۆژئاڤایێ کوردستانێ] وێران بکەت، دەم یێ هاتی ئەردۆغان دەست ژ توندوتیژیێ بەربدەت و ب ئاشتی و ئاقلی کار بکەت و مە باوەری هەیە ئەمریکی دشێن کێشەیا هەسەدێ و تورکیا ب دویماهی بئینن.
عەبدی گۆت ژی: مە چو پەیوەندی ل گەل ئیرانێ نینن و ئەگەر داخوازا پەیوەندییان بکەت ژی، دێ رەت کەین چونکی ئیرانی پشکەک بوون ژ کێشەیا سووریێ و هێزێن گرێدایی وان ل دێرەزوورێ گەلەک هێرش کرینە سەر مە، مە چەک ژ ئیرانێ وەرنەگرتینە و درۆنێن مە خۆمالی نە و نوکە کار ل سەر چەکێ دژە درۆنان دکەین و هەتا نوکە مە 6 فرۆکەیێن تورکیا ئێخستینە.
سەبارەت هەڤدیتنا ل گەل ئەحمەد شەرعی ژی عەبدی گۆت: هەڤدیتنا مە ئەرێنی بوون، وەک رێزەک ئەز ل گەل وی ب عەرەبی ئاخفتن وی ب کوردی بەرسڤا من دا و چەند ئاخفتنەک کرن، چاڤەرێی جێبەجێکرنا گۆتنێن وی نە.
ئەڤە د دەمەکی دا یە کو تورکیا بەردەوام هێزێن خۆ ل گرێ سپی و سەرێ کانییێ زێدە دکەت و بەرهەڤیان بۆ هێرشا ل سەر کۆبانیێ دکەت، بەردەوام ژی هێرشان دکەتە سەر بەنداڤا تشرینێ و هەر رۆژ شەهید و بریندار هەنە، ئەردوغانی دوهی ژی راگەهاندبوو: ئەگەر یەپەگە دەستان ژ چەکان بەرنەدەت دێ ئۆپەراسیۆنا لەشکری دەستپێ کەین.
حەفتیا بۆری، سەرۆک بارزانی و مەزلووم عەبدی ل پیرمام کۆمبوون ول گۆرەیی بارەگایێ بارزانی؛ د کۆمبوونێ دا رەوشا سووریێ، دویماهی پێشهاتێن ئەمنی و سیاسی یێن سووریێ هەروەسا چارچووڤەیێ گشتی یێ مامەلەکرنا ئالیێن کوردی ل گەل رەوشا نووی یا سووریێ و چاوانییا گرتنەبەرا هەلوەستەکێ هەڤپشک یێ ئالیێن کوردی یێن سووریێ باس کرن.
بارەگایێ بارزانی هەروەسا دیار ژی کربوو: هەر د دیدارێ دا دوپاتی ل وێ یەکێ هاتە کرن کو پێدڤییە ئالیێن سیاسی یێن کوردی بێی دەستێوەردانا چ ئالیەکی ب ئاشتی چارەنڤیسێ خۆ دیار بکەن و کورد ب ئێکرێزی و ئێکهەلویستی ل گەل حکومەتا نوی یا سووریێ بگەهنە رێککەفتنێ و فاکتەرێ ئاشتیێ بن، هەڤدەم دڤێت ئالییێن سیاسی یێن کورد رێگریێ ل دوبارەبوونا وان نەهامەتییان بکەن یێن ب سەرێ کوردان هاتی.