ترەمپ سویندا یاسایی دخۆت، بزانە چ د وان مەراسیمان دا دهێتە کرن؟

بەلاڤ بکە

 

گاڤ

تشتێن پێدڤی بزانین دەربارەی سویندخوارنا سەرۆک دۆنالد ترەمپی، کێ دێ د مەراسیمان دا پشکدار بن؟ مەراسیما سویندخوارنێ چاوا دهێتە کرن؟

ل دەما مەراسیما سویندخوارنا سەرۆکێ هەلبژارتی دۆنالد ترەمپی ل کۆنگرێسا ئەمریکا دهێتە کرن، خەلک ل وێرێ ئامادە دبیت.

ئەڤرۆ ل رۆژا دوشەمبێ، دۆنالد ترەمپ دێ بۆ جارا دویێ وەک سەرۆکێ ئەمریکا سویند خۆت.

پشتی کو وی د هەلبژارتنێن سالا 2020ێ دا شکەستن خواری، گەلەکان باوەر دکر کو پاشەرۆژا سیاسی یا ترەمپی ب دویماهی هات، رەخنەگران ژی پرسیار دکر ئەرێ ئەو شکەستن دێ چەند کارتێکرنێ ل ترەمپی کەت؟

ل داویێ، ئیدعایێن وی یێن نەراست دەربارەی ساختەکاریا هەلبژارتنان بوونە ئەگەر ئەمریکی ب کۆم و ب توندی هێرش بکەنە سەر کۆنگرێسا ئەمریکا. پاشی ترەمپ کەفتە بەر لێپرسینێن یاسایی، ژبەر کو وی هندەک بەلگەیێن نهێنی ڤەشارتبوون، ب سەختەکرنا هندەک تۆمارێن دەنگی ژی دهاتە تومەتبارکرن و بەردەوام دگۆت: دەستکاری د هەلبژارتنان دا هاتییە کرن.

لێ پشتی چار سالان و د مەها چریا دویێ یا پار دا، ترەمپی مەزنترین سەرکەفتنا خۆ یا هەلبژارتنان ب دەست ئینا و دێ جارەکا دی ڤەگەڕیتە کۆچکا سپی.

 

 

د دەما سویندخوارنا سەرۆکێ ئەمریکایێ دا چ دقەومیت و کێ دێ بەشدار بن؟

مەراسیما سویندخوارنێ چییە؟ ل ئەمریکا، سویندخوارنا سەرۆکی ئەوە کو سەرۆکێ هەلبژارتی سویندا فەرمی دخۆت و ل وێ رۆژێ ب فەرمی 4 سالێن سەرۆکاتییا وی دەستپێ دکەن.

ژ بۆ سویندخوارنێ، سەرۆکێ هەلبژارتی دەستێ خۆ دادنیتە سەر ئینجیلێ، هەرچەند هندەک سەرۆکان پەرتووکەکا دی یا رۆحانی یان سیاسی هەلبژارتینە.

پشتی خواندنا سویندا فەرمی، سەرۆکێ نوی ئاخافتنا خۆ یا دەستپێکێ پێشکێشی جڤاتا ئالیگر، کەسێن ژێگرتی یێن دەولەتێ و دپلۆماتێن بیانی دکەت.

 

 

 

سویندا فەرمی چ دبێژیت؟

وەکی د دەستوورێ ئەمریکا دا هاتی، سویندا یاسایی ئەڤەیە "ئەز ب ب رژدی سویند دخۆم کو ئەز دێ ب دلسۆزی ئەرکێن سەرۆکێ ویلایەتێن ئێکگرتی یێن ئەمریکی ب جهـ ئینم، و ئەز دێ ب هەمی شیانا خۆ، دەستوورێ ویلایەتێن ئێکگرتی یێن ئەمریکی پارێزم و بەرەڤانیێ ژێ کەم."

 

 

 

ترەمپ دێ ل سەر کیژ پەرتووکێ سویند خۆت؟

د مەراسیما خۆ یا ئێکێ یا 2017ێ دا، ترەمپ ل سەر هەمان ئنجیلا کو ئەبراهام لینکۆلنی ل سالا 1861ێ بکار ئینای سویند خوار. وی ئنجیلەکا دی ژی بکار ئینا کو دایکا وی یا رەحمەتی ماری ئان ماکلێۆدێ بۆ وی کربوو دیاری.

راپۆرتێن مێدیایێ نیشان ددەن کو ترەمپ ئەڤ سالە دێ هەر وەک جارا بۆ سویندخوارنێ دو ئنجیلان بکار ئینیت: ئینجیلا لینکۆلنی، و ئنجیلا ژ دایکا وی.

 

 

 

مەراسیما سویندخوارنێ کەنگی و ل کیڤەیە؟

مەراسیم دێ ل ئەڤرۆ 20 کانوینا دویێ ل دەمژمێر 11:00 سپێدێ ب دەمێ واشنتون هێنە کرن.

مەراسیم د دەستپێکێ دا ل دەرڤە، ل ئالیێ رۆژئاڤایێ کۆنگرێسا ئەمریکا، ل هەمبەر پارکا ناشنال مال هێنە کرن، لێ ژبەر نزمبوونا پلەیێن گەرمێ و بابەتێن گرێدای ئێمناهییێ، ترەمپی ل رۆژا ئەنییا بۆری بریار دا مەراسیم بچنە د ناڤ هۆلا کۆنگرێسی دا و سویندا یاسایی ل بن قوبەیا وی یا 88 متران بلند بخۆت.

ل ڤێرێ کێشەیەکا دی روست بوو، ژبەر کو ئەگەر مەراسیم د کۆنگرێسی ڤە بهێنە کرن، ژمارەیا ئامادەبوویان دێ سنۆردار بیت. 250 هزار کەسان پلێت کڕیبوون کو د مەراسیمان دا ئامادە ببن، لێ پشتی مەراسیم بۆ ناڤ کۆنگرێسی هاتینە ڤەگوهاستن، ترەمپی داخواز ژ وان کر ل کاپیتۆل وەن ئەرێنا ل بەر پەخشێ زیندی تەماشەی خوارنا سویندا یاسایی بکەن و وی سۆز دایێ پشتی خوارنا سویندێ، ل دەف وان ژی ئامادە ببیت.

 

 

 

کی دێ د مەراسیمان دا ئامادە بیت؟

د مەراسیمێن دەستبکاربوونا ترەمپی دا 3 سەرۆکێن پێشتر، باراک ئۆباما، جۆرج دەبلیۆ بۆش و بیل کلینتۆن دێ ئامادە بن و هەروەسا سەرۆکێ نوکە یێ ئەمریکا جۆ بایدن و جێگرا وی کامالا هاریس ژی دێ ئامادە بن کو ترەمپ د هەلبژارتنان دا ب سەر هەردویان سەرکەفتییە، بایدنی خۆ ڤەکێشابوو و هاریس د هەلبژارتنان دا سەرنەکەفتبوو.

ل سەر ئاستێ جیهانێ، سەرۆک و سەرکردەیێن راسترەوێن توند ژ چەندین وەلاتان دێ ئامادە بن، ژ وان، سەرۆکێ ئەرجەنتینێ، سەرۆکوەزیرا ئیتالیا و ژمارەیەکا سیاسەتڤانێن فرەنسی و بریتانی.

گایێر پۆلسۆنارۆ، سەرۆکێ بەرێ یێ بەرازیلێ ژی هاتبوو داخوازکرن و دخواست بچیت، لێ ژبەر هندەک کەیسێن گرێدای گەندەلییێ، پاسپۆرتا وی ژێ هاتییە وەرگرتن و دادگەها بلند یا وی وەلاتی رازی نەبوو پاسپۆرتا وی بۆ بهێتە ڤەگەڕاندن، ژبەر کو ترس هەبوو ئەو د ئەمریکا را بڕەڤیت.

دەولەمەندترین کەسێن ئەمریکا و جیهانێ، ئیلۆن مەسک، جێف بێزۆس، مارک زۆکەربێگ و چەندین دەولەمەندێن دی ژی دێ د مەراسیمان دا ئامادە بن.

 

زێدەتر دەربارەی