سعوودیە: دێ ب 600 ملیار دۆلاران وەبەرهێنانێ ل گەل ئەمریکا کەین
گاڤ
تاجپارێزێ ئەرەبستانا سعوودییێ د پەیوەندییەکا تەلەفۆنی دا پیرۆزباهی ل سەرۆکێ نوی یێ ئەمریکا کر و سۆز دایێ ب کۆژمێ 600 ملیار دۆلاران وەبەرهێنانێ ل گەل وەلاتێ وی بکەت.
ل گۆرەی مەدیایێن فەرمی یێن ئەرەبستانا سعوودییێ، محەمەد بن سەلمان، تاجپارێزێ سعوودییێ د پەیوەندییەکا تەلەفۆنی دا پیرۆزباهییێن خۆ و بابێ خۆ یێ شاهـ گەهاندینە دۆنالد ترەمپ، سەرۆکێ ئەمریکا و بەردەوامییا پەیوەندییێن دۆستانە یێن سعوودییێ ل گەل ئەمریکا بۆ ترەمپی دوپات کرییە.
مەدیایێن سعوودییێ وەسا ئاماژێ ددەن کو بن سەلمانی سۆز دایە ترەمپی د 4 سالێن بهێن دا سعوودیە ب کۆژمێ 600 ملیار دۆلاران وەبەرهێنانێ ل گەل ئەمریکا بکەت.
هەرچەندە د عورفێن ئەمریکا دا وەسایە کو ل دەما سەرۆکێ نوی دەستبکاردبیت، ئێکەم سەرەدانا ژ دەرڤە یا سەرۆکی بۆ بریتانیا بیت، لێ ل دەما ل سالا 2017ێ دۆنالد ترەمپ وەک سەرۆکێ 45ێ یێ ئەمریکا دەستبکاربووی، ئێکەم سەرەدانا ژ دەرڤە بۆ ئەرەبستانا سعوودییێ کربوو، ل وی دەمی سعوودییێ رێککەفتنەک ل گەل ئەمریکا کربوو کو ب کۆژمێ 450 ملیار دۆلاران وەبەرهێنانێ بکەت و ل دەما ڤێ جارێ ترەمپ دەستبکاربووی، د بەرسڤا رۆژنامەڤانەکی دا گۆت: ئەگەر سعوودییێ ب کۆژمێ 500 ملیار دۆلاران وەبەرهێنانێ ل گەل ئەمریکا بکەت، دویر نینە ڤێ جارێ ژی ئێکەم وەلات سەرا بدەت، سعوودیە بیت.