ئەمریکا پێدانا پاسپۆرتێ ب کەسێن رەگەزێ خۆ گۆهارتی راگرت
گاڤ
ل سەر بنەمایێ بریارا ترامپی، ئەمریکا پێدانا پاسپۆرتێ ب کەسێن رەگەزێ خۆ گۆهارتی راگرت.
ل 20ی ڤێ مەهێ پشتی رێورەسمێن سویند خوارنێ، دۆنالد ترەمپ، سەرۆکێ ئەمریکا راگەهاند؛ ب تنێ دو رەگەز ل ئەمریکا هەنە و رێک ب گۆهەرینا رەگەزی ژی ناهێتە دان.
پەیڤدارەکی ل وەزارەتا دەرڤە یا ئەمریکا راگەهاند؛ ل سەر بنەمایێ بریارا ترامپی، پشکا دەرکرنا پاسپۆرتان ل وەزارەتا دەرڤە نۆکە ل گۆرەی وێ بریارێ مامەلێ ل گەل رەگەزان دکەت و ژ نوکە پاش پاسپۆرتێ نادەتە وان کەسان ئەوێن خۆ وەک رەگەزێ "ئێکس" ئانکو رەگەزێ سێیێ تۆمارکری.
دا زانین ژی: ل پاشەرۆژێ دێ ڕێنمایان دەربارەی وان کەسان دەن یێن بەری نوکە پاسپۆرتا " ئێکس" وەرگرتی.
ل نیسانا سالا 2022ێ جۆ بایدن، سەرۆکێ بەری نۆکە یێ ئەمریکا ب بریارەکێ رێ دا وەلاتیێن ئەمریکی داخوازا پاسپۆرتا رەگەزێ سێیێ بکەن.
ل گۆرەی ئامارێن فەرمی، د نوکە دا ل ئەمریکا 3 ملیۆن کەسان خۆ وەک رەگەزێ سێیێ دانایە کو دبیتە 1.14 یا خەلکێ وی وەلاتی.