ترەمپ: کێ گۆتییە ئەم دێ هێزێن خۆ ژ سوورییێ ڤەکێشین؟
01/31/2025 - 11:52
گاڤ
سەرۆکێ ئەمریکا داخۆیانییەک دەربارەی چارەنڤیسێ هێزێن ئەمریکا ل سوورییێ دا و راگەهاند: وی نەگۆتییە ئەمریکا دێ هێزێن خۆ ژ سوورییێ ڤەکێشیت.
د رۆژێن بۆری دا، چەندین مەدیایێن تورکی و ئسرائیلی وەسا بەلاڤکربوو کو دۆنالد ترەمپ، سەرۆکێ ئەمریکا دێ هێزێن ئەمریکی ژ دەڤەرێن کوردی یێن سوورییێ ل سەر خاترا تورکیا ڤەکێشیت و ل بەرانبەر وێ، تورکیا دێ پەیوەندییێن خۆ ل گەل ئسرائیلێ ئاسایی کەت.
دۆنالد ترەمپی ل کۆچکا سپی د بەرسڤا هندەک رۆژنامەڤانان دا گۆت: کێ گۆتییە ئەم دێ هێزێن خۆ ژ سوورییێ ڤەکێشین؟ ئەز نزانم ژێدەرێ وان زانیارییان کی یە!
د بەردەوامییا ئاخفتنا خۆ دا ترەمپی گۆت: وان پەیوەندی ب وان گوهۆڕینان ڤە نینە یێن نوکە ل سوورییێ چێبووین، سووری ب خۆ ژێ بەرپرسن و ل دەمێن بهێن ئەو دێ بڕیارێ دەن کا هێزێن وان ل سوورییێ بمینن یان نە.