بۆچی ناڤێ من کرنە ئیدریس؟

بەلاڤ بکە

ئیدریس سالح

د ناڤ کوردندا یا بەربەلاڤە کو دایک و بابێن کورد گەلەک جاران ناڤێ هندەک کەسێن دى دادنێنە سەر زاڕۆکێن خۆ.

ئەڤە ژی چەند سەدەمێن خۆ هەبووینە: یان کەسێ ژ دل خۆشتڤی بوویە، یان کەسەکێ جوان، زیرەک، ئازا و مێرخاس بوویە، گەلەک جاران ژی دبیت سەرکردە یان شۆڕشگێڕەک بیت، مەبەست ژ ڤێ ناڤدانانێ ژی ئەو بوو کو زاڕۆک ببیتە خودانێ هەمان تایبەتمەندییێن وی کەسێ کو ب ناڤێ وی هاتیە ناڤکرن.

ئەڤرۆ سالڤەگەڕا وی مرۆڤێ مەزنە یێ کو بابێ من ناڤێ وی ل من کری، ب وێ هیڤیێ کو رۆژەک بهێت، ئەز درێژەپێدەرێ رێبازا وی بم و ل سەر رێکا وی گاڤان ب هاڤێژم، کارى بۆ وان ئارمانجێن کو وی هەبوون و هێشتا نەهاتینە بجهئینان، دا کو من مل بدەمە بەر ئاستەنگ و زەحمەتییان، نە ژ بۆ خۆ بژیم و د بیر و خەما گەل و وەلاتێ خۆ دا بم.

بابێ من دبێژیت: "من ناڤێ تە کرە ئدریس، دا کو تو وەکی ئدریس بارزانی، بیرتیژ و زانا بی، وەکی وی ژ بۆ ئاشتی و ئێکڕزییا گەلێ خۆ کار بکەی، هەتا ئەم دگەهینە لووتکا ئازادیێ، دا کو تۆ و زاڕۆکێن مە یێن دی وەکی من، د زیندانا دوژمنان دا ئێش و ئازاران نەبینن. ب وێ ئومێدێ من ناڤێ کاک ئدریس ل تە کر، دا کو تو وەکی وی ڤیانێ د دلێ خەلکى دا بچینی و هەردەم رۆناهییا هیڤیێ بی."

جارەکێ ل مالێ روونشتی بووین، مامەکێ من بەحسا سیفەتێن جوانێن کاک ئدریسی دکر. من ژی گۆت: "سوپاس مامێ دەلال." گۆت: "ببۆرە مەبەستا من نە تۆیی، مەبەستا من ئدریس بارزانییە." دەما باسێ جوانی و مێرخاسی و مەزناتییا وی سەرکردەیی دهێتە کرن، ئەز ژ جهێ خۆ دلخۆش دبم، تەنێ ژ بەر کو ئەز هەلگرێ ناڤێ ویمە، چ دلخۆشیەکە ژ بۆ وی کو هەلگرێ وان سیفەتانە!

 

زێدەتر دەربارەی