پەیاما سەرۆک نێیچیرڤان بارزانى ل دۆر پەسەندکرنا بودجەیا ئیراقێ
گاڤ
سەرۆکێ هەرێما کوردستانێ پێشوازیێ ل دەنگدانا جڤاتا نوینەرێن ئیراقێ کر ل سەر راستڤەکرنا یاسایا بودجەیا گشتى یا ئیراقێ و گۆت: ئەڤە پێنگاڤەکا دروست و ئۆمێدبەخشە و د بەرژەوەندا تەماما ئیراق و هەرێما کوردستانێ دایە
نێچیرڤان بارزانى، سەرۆکێ هەرێما کوردستانێ پەیامەک ل دۆر پەسەندکرنا بودجەیا گشتى یا ئیراقێ بەلاڤکر و سوپاسییا جڤاتا نوینەرێن ئیراقێ و وان کر یێن ئامادەکرین و پەسەندکرین، هەروەسا گۆت: محەمەد شیاع سوودانى، سەرکۆوەزیرێن ئیراقێ ب گیانەکێ نشتیمانى ل گەل مە هاریکار بوو بۆ چارەکرنا پرسێن گرێدایى بودجەیى و مافێن دارایى یێن هەرێمێ و دەستخۆشى ل شاندێ دانوستاندکار و ئالیێن پەیوەندیدار یێن حکومەتێن هەرێم و ئیراقێ کر.
سەرۆک نێچیرڤان بارزانى ئاشکراکر، ئەڤە پێنگاڤەکا دروست و ئۆمێدبەخشە و د بەرژەوەندا تەماما ئیراق و هەرێما کوردستانێ دایە و گۆت: "هیڤیدارم ببیتە دەستپێکەک بۆ چارەکرنا کێشەیێن دى و ب زووترین دەم نووچەیێن دلخۆشکەر ببهیسین".
سەرۆکێ هەرێما کوردستانێ دیارکر، د خوازین ب زویترین دەم پرسێن مووچەیى و مافێن دارایى یێن هەرێمێ بهێنە چارەکرن و دوپات دکەین د بزافان داینە بۆ چارەکرنا هەمى کێشەیان ب شیوەیێ دیالۆگ و لێکتێگەهشتن.