گاڤ

سەرۆکێ ئەمریکا هەر ژ رۆژا ئێکێ یا دەستبکاربوونێ دەست ب دیپۆرتکرنا کۆچبەران کرییە و سەرۆکا مەکسیکێ دبێژییت: ب هزاران کۆچبەرێن نەمەکسیکی ژی بۆ وی وەلاتی هاتینە دیپۆرتکرن.

دۆنالد ترەمپ، سەرۆکێ ئەمریکا د بانگەشەیا هەلبژارتنان دا سۆزا دیپۆرتکرنا کۆچبەرێن نەیاسایی دابوو و هەر ژ ئێکەم رۆژا دەستبکاربوونێ، دەست ب دیپۆرتکرنا کۆچبەران کرییە.

کلاودیا شەینباوم سەرۆکا مەکسیکێ راگەهاند: ب فەرمانا سەرۆکێ نوی یێ ئەمریکا نێزیکی 11 هزار کەسان ژ ئەمریکا بۆ مەکسیکێ هاتینە دیپۆرتکرن کو 2 هزار و 500 ژ وان مەکسیکی نینن.

سەرۆکا مەکسیکێ دیار ژی کر: ئەو کۆچبەر ب زۆری نەهاتینە دیپۆرتکرن، بەلکو ب رەنگەکێ خۆبەخشانە ژ ئەمریکا ڤەگەڕیاینە و پشکەک ژ وان کۆچبەرێن نەمەکسیکی، دێ ژ مەکسیکێ بۆ وەلاتێ هندۆراس هێنە ڤەگوهاستن.