گاڤ

سەرۆکێ ئەمریکا راگەهاند: ئەو ب تەلەفۆنێ ل گەل سەرۆکێ  رۆسیا ئاخفت و گرنگییا بلەز راوەستیانا شەڕێ ل دژی ئۆکراینا بەحسکر.

دۆنالد ترەمپ، سەرۆکێ ئەمریکا راگەهاند: ئەو و ڤلادیمێر پۆتین، سەرۆکێ رۆسیا د پەیوەندییەکا تەلەفۆنی یا درێژ دا، ل سەر چەندین مژاران ئاخفتن، ئێک ژ وان مژاران شەڕێ رۆسیا ل دژی ئۆکراینا بوو و وی گۆتییە پۆتینی "پێدڤییە شەڕێ ل دژی ئۆکراینا ئێکسەر رابگری".

ئاژانسا رۆیتەرز دەربارەی وێ پەیوەندییا تەلەفۆنی ئاشکراکرییە: ترەمپی بریار دایە پشتی ب دویماهیهاتنا پەیوەندییا تەلەفۆنی یا ل گەل پۆتینی، ئێکسەر ناڤەرۆکا وێ پەیوەندییێ یا گرێدایی شەڕێ رۆسیا و ئۆکراینا، بگەهینیتە ڤلادیمێر زیلینسکی، سەرۆکێ ئۆکراینا.

ترەمپی دەربارەی وێ پەیوەندییا تەلەفۆنی دیار ژی کرییە: وی و پۆتینی بەحسا پەیوەندییێن مێژوویی یێن ئەمریکا و رۆسیا کرییە و پۆتینی ئەو بۆ سەرەدانا مۆسکۆ داخوازکرییە.

شەڕێ رۆسیا ل دژی ئۆکراینا ئێک ژ وان بابەتان بوو کو ترەمپی د بانگەشەیا هەلبژارتنان دا مفا ژێ دیتبوو و بەردەوام دگۆت: ئەگەر ئەو سەرۆکێ ئەمریکا با، رۆسیا وێرەکی نەدبوو هێرش بکەتە ئۆکراینا.