حسێن قائیدى – شیرەتکار ل سەرۆکاتیا هەرێما کوردستانێ

پشکدارییا سەرۆک نێچیرڤان بارزانى د کۆنگرەیێ میونشن دا نامەیەکا زەلالە کو هەرێما کوردستانێ دشێت بازنەیا کارتێکرنا خۆ بەرفرەهتر بکەت و رەنگڤەدانێن مەزن یێن ئارامی و پاراستنا سەقامگیرى و ئاساییشێ ل دەڤەرێ بچینیت، هەروەسا سەرۆک نێچیرڤان بارزانى هەردەم هەرێمێ پێگیر دکەت ب باشترکرنا بەرقرارییا هەرێمى و جیهانى.

کۆنفرانسێ میونشن یێ ئاساییشێ ب پشکدارییا چەندین سەرکردەیێن وەلاتان بۆ دەما سێ رۆژان دێ هێتە سازکرن، کو سوبەهى ئەینیێ 14 تا 16ى ڤێ مەهێ یە، سەرۆک نێچیرڤان بارزانى ئێک ژ وان سەرۆکێن دیار یێن پشکدارێن کۆنفرانسى یە و دیدارێن وى دێ نامەیا زەلال یا هەرێمێ و بەفرەهکرنا بازنەیا کارتێکرنێ مژارێن وى بن.

پشکدارییا نێچیرڤان بارزانى، سەرۆکێ هەرێما کوردستانێ د کۆنفرانسێ میونشن یێ ئاساییشێ دا دەلیڤەیەکا ستراتیژى یا بەردەوام یا دپلۆماسیەتا هەرێما کوردستانێ یە ل سەر ئاستێ هەرێمى و نێڤدەولەتى، زێدەبارى کو کۆنفرانس بۆ ل هەڤگوهارتنا دیتنانە بۆ ئاشتییا جیهانى، پشکدارییا سەرۆک نێچیرڤان بارزانى نەبتنێ ئامادەبوونەکا فەرمى یە، بەلکو دەلیڤەیەکا ساخە بۆ ئاراستەکرنا دیتنا هەرێمێ د چارچووڤێ هەڤڕکیێن ئێمناهى و سیاسى دا و پشتەڤانییا ئارامییا دەڤەرێ وەک مژارەکا سەرەکى یا بادەکا سەرۆک نێچیرڤان بارزانى.

د دەمەکى دا جیهان د قەیران و هەڤڕکیێن مەزن دایە، لێ سەرۆک نێچیرڤان بارزانى هەردەم ئەو کەسەیە ل چارەیان د گەڕیت و ئەڤ پشکدارییە ژى ئێک ژ وان دەرگەهانە کو سەرۆک د قوتیت دا دانوستاندنێن نێڤدەولەتى ب دەستخۆڤە بینیت، هەروەسا بۆ دیارکرنا هەلوەستێ کوردانە ل رۆژهەلاتا ناڤین و ئیراقێ و ب تایبەت ژى د چارچووڤێ گوهۆڕینێن جیۆسیاسى یێن دەڤەر تێدا دژیت، هەروەسا دیارکرنا شیانێن هەرێمێ و کارتێکرنا وێ ل سەر بڕیارێن نێڤدەولەتى یێن تایبەت ب پاشەرۆژا ئێمناهى و سیاسى و دپلۆماسى یا دەڤەرێ ڤە.

د چارچووڤێ کۆنفرانسى دا پێشبینییە نێچیرڤان بارزانى قەبارێ بەرسینگگرتنێن ل هەمبەرى هەرێمێ، ژ ئالییەکى ڤە وەک گەفا تیرۆرێ و ئالۆزییا رەوشا دەڤەرێ هەڤدەم هەڤکارییا هەرێمێ ل گەل جیهانێ وەک هەرێمەکا ئارام بۆ بەرقرارکرنا ئاشتى و ئارامیێ ل هەمبەرى رۆژهەلاتا ناڤین بەحس بکەت.

ئامادەبوونا سەرۆک نێچیرڤان بارزانى ل میونشن ئاماژەیەکا بهێزە کو هەرێم نەبتنێ پشکەکە ژ ئیراقێ، بەلکو یاریکەرەکێ سەرەکى یێ ئەکتیڤ و کارایە د مەیدانا هەرێمى و نێڤدەولەتى دا، هەروەسا بۆ گەهاندنا دەنگێ دروست یێ کوردستانێ یە د وارێن هەڤکارییا بەردەوام د وارێن ئێمناهى، بەرگرى و ئابۆرى دا.

هەروەسا ئەڤ جۆرێن پشکدارییان هەڤسەنگییا سیاسەتا دەرڤە و ناڤخۆ ژى دروست دکەن و پێگیرییا هەرێما کوردستانێ ژى ل دۆر پەیوەندیێن هەڤپشک ل گەل کۆمەلگەها نێڤدەولەتى بەرەف پەناگەهێن ئارامیێ دبەن، شیانێن سەرۆک نێچیرڤان بارزانى بۆ دیتنا رێکێن ستراتیژى ل گەل زلهێزێن جیهانێ نە بتنێ گۆتنە، بەلکو گەرەنتییا گەشەکرنێ یە ل دەڤەرێ ب گشتى و ل ئیراق و هەرێما کوردستانێ ژى ب تایبەتى.