سەرۆک نێچیرڤان بارزانی و سەرۆکێ ئەستۆنیا کۆمبوون
بەلاڤ بکە
گاڤ
د چارچووڤێ کۆنفرانسێ میونشن یێ ئاسایشا جیهانی دا ئەڤرۆ سەرۆک نێچیرڤان بارزانی ل گەل سەرۆکێ ئەستۆنیا ئالار کاریس کۆمبوو.
ل گۆرەی بەیانەکا سەرۆکاتیا هەرێما کوردستانێ، پەیوەندیێن دوقولی د ناڤبەرا ئیستۆنیا و ئیراق و هەرێما کوردستانێ دا هاتنە بەحسکرن، هەروەسا بەحس ل چەوانیا بهێزکرنا هاریکاریێن هەڤپشک د بوارێن ئاسایش و تەکنۆلۆژیا و پەروەردێ دا کر.
سەرۆک نێچیرڤان بارزانی سوپاسیا پشتەڤانیا ئیستۆنیا د چارچووڤەیێ هەڤپەیمانیا نێڤدەولەتی یا دژی داعشێ کر، هەروەسا پەسنا دەلیڤەیێن هاریکاریێ د بوارێن تەکنۆلۆژیا و خواندنا بلند د ناڤبەرا هەردو ئالیان دا کر.
ژ ئالیێ خۆ ڤە ژی سەرۆک ئالار کاریس، خواستا ئیستۆنیا بۆ بەرەڤپێشبرنا پەیوەندیێن ل گەل هەرێما کوردستانێ دوپاتکر و سەرۆک نێچیرڤان بارزانی ب فەرمی داخوازکر سەرەدانا ئیستۆنیا بکەت.
هەلبژارتنێن پەرلەمانێ کوردستانێ و بزاڤێن پێکئینانا کابینەیا نوی یا حکومەتێ و پێشهاتێن ئیراق و سووریێ ژی بەحسکرن.
