گاڤ

سەرۆکێ هەرێما کوردستانێ هەڤدەمی ب دویماهیئینانا سەرەدانا خۆ بۆ ئەلمانیا، کۆنگرەیەکێ رۆژنامەڤانی کر و چەندین بابەتێن گرنگ بەحسکرن.

نێچیرڤان بارزانی، سەرۆکێ هەرێما کوردستانێ ئەڤرۆ د کۆنگرەیەکێ رۆژنامەڤانی دا بەحسا چەندین بابەتێن گرێدایی هەرێما کوردستانێ، ئیراقێ، تورکیا، سووریا، ئیرانێ و ئەمریکا کر.

سەرۆکێ هەرێما کوردستانێ دەربارەی بابەتێن گرێدایی ناڤخۆییا هەرێما کوردستانێ، راگەهاند: پارتی و ئێکەتی بۆ پێکئینانا کابینەیا دەهێ یا حکومەتا هەرێما کوردستانێ د دانوستاندنان دانە، نوکە دانوستاندن ل سەر وێ یەکێ دهێنە کرن کا پێناسەیا شەراکەتێ چ یە و پاشی دێ دانوستاندن ل سەر دیارکرنا پلە و پۆستان هێنە کرن.

دەربارەی هێزێن پێشمەرگەی، سەرۆک نێچیرڤان بارزانی گۆت: هەرچەندە پرۆسەیا ئێکخستنا هێزێن پێشمەرگەی بلەز بڕێڤەناچیت، لێ پرۆسە نەراوەستیایە و ئەڤ بابەتە بۆ هەڤپەیمانێن هەرێما کوردستانێ ژی گرنگە.

سەرۆکێ هەرێما کوردستانێ بەحسا بزاڤێن دەستپێکرنا پرۆسەیا ئاشتییێ ل تورکیا کر و گۆت: ئەو هەست دکەن تورکیا ل سەر بابەتێ دەستپێکرنا قووناغا ئاشتییێ یا رژدە و ئەو پێشبینی دکەن تا دویماهییا ڤێ مەهێ پەیاما ئۆجالانی بهێتە راگەهاندن، لەورا ئەو هیڤیخوازن پەکەکە پێگیرییێ ب پەیاما ئۆجالانی بکەت، ژبەر کو کەیسا کوردان ل تورکیا ب شەڕی چارە نابیت.

سەرۆک نێچیرڤان بارزانی سوبەهی دێ ل هەولێرێ ل گەل شاندا دەم پارتییێ کۆم بیت و دەربارەی وێ شاندێ گۆت: نوکە بابەتێ پرۆسەیا ئاشتییێ د دەست وێ شاندا دەم پارتی دایە یا نوکە ل هەرێما کوردستانێ.

سەرۆکێ هەرێما کوردستانێ بەحسا سوورییێ ژی کر و گۆت: سووریا بابەتەکێ سەرەکی یێ هەمی کۆمبوونێن وان یێن میۆنشن بوو و یا ژ هەرێما کوردستانێ هاتی، بۆ کوردێن سوورییێ کرییە و ب باوەرییا وی هەرێم د وی بابەتی دا یا سەرکەفتی ژی بوو.

دەربارەی پاشەرۆژا سوورییێ، سەرۆک نێچیرڤانی ژ کوردێن سوورییێ خواست خۆ ب خودانێن سووریا یا نوی بزانن و بۆ دانوستاندنان ئێکگرتی بچنە دیمەشقێ، لێ مەرج نینە ئەو سیستەمێ فیدرالی بکەنە مەرجێ دانوستاندنان، ژبەر کو سووریا پێدڤی ب سیستەمەکی یە هەمی پێکهاتەیێن وێ ل سەر درازی بن.

سەرۆک نێچیرڤان بارزانی بەحسا ئیرانێ ژی کر و دیارکر: پەیوەندییێن هەرێما کوردستانێ و ئیرانێ ل سەر بنەمایێ رێزگرتنا هەڤپشکن، هەرێم مایێ خۆ د کاروبارێن ناڤخۆ یێن ئیرانێ دا ناکەت و پێشبینییا هەمان سەرەدەری ژ ئیرانێ ژی دکەت.

سەرۆکێ هەرێما کوردستانێ د بەردەوامییا ئاخفتنا خۆ دا بەحسا ئیدارەیا نوی یا ئەمریکا کر و گۆت: سیاسەتا دۆنالد ترەمپ، سەرۆکێ ئەمریکا ئەوە شەڕان ل جیهانێ نەهێلیت، لەورا پێدڤییە هەمی ئالی پێشوازییێ ل نەهێلانا شەڕان بکەن.

دەربارەی هێزێن ئەمریکا و هەڤپەیمانان ل ئیراقێ، سەرۆک نێچیرڤان بارزانی گۆت: هەرێما کوردستانێ مانا هێزێن هەڤپەیمانان ل ئیراقێ ب فەر دزانیت، ژبەر کو هێشتا مەترسییا داعشێ ب دویماهی نەهاتییە.

دەربارەی رۆلێ هەرێما کوردستانێ د هەڤکێشەیێن دەڤەرێ دا، سەرۆک نێچیرڤان بارزانی گۆت: هەرێما کوردستانێ وەک فاکتەرەکێ بەرقەرارکرنا سەقامگیرییێ ل رۆژهەلاتا ناڤین کار دکەت و دانوستاندنێن هەرێمێ ل گەل هەمی وەلاتان ل سەر وی بنەماینە.