شێروان تالب

د ڤان رۆژان دا د جڤاتەکا ناڤخۆیی دا، بەحسێ سووریێ و رەوشا وێ یا نوی هاتەکرن، برادەرەکێ نێزیک ژ سەرۆک نێچیرڤان بارزانی و هایدارێ لڤینێن وی یێن سیاسی و نەبەحسکری، هندەک گۆتن ل سەر رۆلێ پشت پەردێ یێ سەرۆک نێچیرڤان بارزانی و خەما وی بۆ رەوشا نوکە یا سووریێ بەحسکرن و چەند مەوقفێن وی ل گەل هەمی زلهێزێن جیهانێ دیارکرن، خۆزی گۆتبا کو ئاسایە بەحس بکەین، دا ئەز نوکە بەحس کەم. لێ گۆت د ناڤبەرا مە دا بیت، ژبەر ڤێ یەکێ نەشێم چ بێژم، لێ ئەگەر نوکە نەبێژم ژی، ب پشتراستی ڤە مێژوو دێ ژ زارێ خودان وژدانەکی ڤە هەر بێژیت.

ژ وێ جڤاتێ بگەرن، دا بەحسێ میونشن بکەین..

د 3 رۆژان دا 30 دیدار ل میونشن هەبوون، ئەگەر ب چاڤەکێ بلەز ژی بەرێ خۆ ب دەیە نووچەیان چ نووچەیان نابینی کو تێدا مافێن کوردان ل سووریێ، پێگەهـ و جهێ کوردان ل سووریێ، پاشەرۆژا کوردان ل سووریێ جهێ بەحس و گرنگی و دویڤچوونێن وی نەبیت، چ زلهێز و خودان بریارەک ل جیهانێ نەما بۆ وی بەحسێ کوردان ل سووریێ نەکربیت.

ئەڤ سالە کۆنگرێ ئاسایشا جیهانی میونشن، هەڤدەم بوو ل گەل گەرمترین بەحسێ رۆژێ ل جیهانێ، کو گوهۆڕینێن بلەز و درامایی یێن سووریێ بوون.

رۆژهەلات و رۆژئاڤا چەوا بەرێ خۆ ددەنە وان گوهۆڕینان و دڤێن بەرەڤ کیڤە ببەن، ئەز نزانم، لێ ب هزرا سەرۆک نێچیرڤان بارزانی کو وی ب خۆ ل هەمبەر کەسایەتیێن خودان بریار و ل هەمبەر میدیایێ ژی بەحسکریە، د سووریایا نوی دا، کورد وەک پێکهاتەیەکا سەرەکی پێدڤیە مافێ هەبوونێ و مافێ شەراکەتێ ل وەلاتی دا و مافێ پشکداریێ د دەستهەلاتێ دا هەبیت، راستە وی ب ئاشکرایی ئەڤە نەگۆت، لێ من گوهلێبوویە کو وی رویبروی ب هەمیان گۆتیە، ئەگەر نە، سووریێ ژی سەقامگیر نابیت.

ب راستی ئەو هەر ب ڤێ نەراوەستیا کو دیدگەها خۆ بۆ مافێن کوردان ل سووریێ ب پشتراستی ڤە بێژیت، بەلکو رێکا بدەستڤەئینانا وان مافان ب ئالیێن کورد یێن سیاسی و کەسایەتیێن خودان پێگەهـ ژی گۆت و ب ئاشکرایی گۆتە وان: "راستە هوین د جودانە، لێ نەبتنێ بۆ بدەستڤەئینانا مافان، بەلکو بۆ مرنێ ژی پێکڤەبن" .

ئەڤ ئاخفتنە دەمەکێ درێژە ل گەلەک جهێن دی بۆ گەلەک کەسان و گەلەک ئالیێن دی کریە، ڤێجا یێ ب ئاخفتنا وی کر دێ قازانجێ کەت و ئەوێ نەکەت ژی ب مخابنێ ڤە یێ زەرەرمەندە.