تەنیا کوردى

دەمێ سەرۆکێ هەرێما کوردستانێ داخوازێ ژ کوردێن سووریا دکەت ب ئێک دەنگ بچنە دیمەشقێ، ئەڤە بتنێ ئامۆژگارى نەبوو، بەلکو نیشاندانا نەخشەڕێیەکى بو بۆ ناوچێ و جیهانێ کو ئێدى دبلۆماسییەتا بلندا کوردى کووراتییا ستراتیژى هەیە، د مامەلەکرنێ ل گەل پێشهات و روودانێن ناوچێ، ب زمانەکێ دبلۆماسى و بلند سەرۆک نێچیرڤان راگەهاند کو چوونا کوردان بۆ بەغدا پشتى سەرهەلدانێ و پشتى ئازادکرنا ئیراقێ، نموونەیەکا زندى یا سەرکەفتنا هێزێن کوردیە ل سووریا، ئاماژەیەکا بهێز ژى بوو کو ب هێزێن کوردى گۆت ئێد خۆ ل سووریا ب مێڤان نزانن، سووریا یا هەوەیە.

نێزیکبوونا پارتى و ئێکەتیێ بۆ پێکئیننا کابینەیا دەهێ، پەیامەکا بهێزە بۆ هەمى ئالییەکى کو هەرێما کوردستانێ مژوولى گوهۆڕینا یاریا سیاسى یە ل ناوچێ، ئەڤ تەباییا ناڤبەرا مالا کوردى دبیتە ژێدەرێ هێزەکا نوى بۆ گەهشتن ب ئارمانجێن نەتەوەیى.

ل میونشن، سەرۆکێ هەرێما کوردستانێ نیەتا هەرێمێ وەک پشکەک ژ چارێ بۆ سەقامگێرییا ناوچێ نیشان دا، د پرسا ئاشتیێ دا ل تورکیا تا سەقامگێرى ل سووریا و بهێزکرنا فیدرالییەتێ ل ئیراقێ، ئەڤە گوهۆڕینێن جەوهەری بۆ پێگەهێ هەرێمێ کو بەرپرسێن بلند یێن جیهانێ ل میونشن حێبەتى کرن.

سەرۆک نێچیرڤان بارزانى دوبارە بۆ ناوچێ نیشان دا کو هێزەکا نوى ل رۆژهەلاتا ناڤین هەیە، کو دڤێت پشکداریی د دارشتنا ئاشتى و سەقامگێریێ دا بکەت، ئەو ژى هەرێما کوردستانێ یە، ئەو ژى دەرئەنجامێ وێ دیپلۆماسییەتا ژیرانە یە کو دشێت ببیتە ژێدەرێ هێزەکا راست.