گاڤ

پەیامەک ژ سەرۆک مەسعوود بارزانی دەربارەی هێرشێن ئەڤرۆ ل سەر جۆتیارێن کەرکووکێ و رێگریکرنێ ل هەمبەر چوونا وان بۆ سەر ئەردێن وان.

سەرۆک مەسعوود بارزانی د پەیاما خۆ دا نڤیسیە "دیمەنێن ئازاردانا جۆتیارەکێ کورد و رەفتارێن بکێرنەهاتی و رێگریکرن ل جۆتیارێن کورد ل چوونا وان بۆ سەر ئەردێن وان، دیمەنێن ئەنفال و کیمیاباران و جینۆسایدکرنا کورێن گەلێ مە ل سەدەیا بەرێ دئینیتە بیرا مە".

هەروەسا نڤیسیە "ئەڤە رەفتارەکا شۆفینیانە و بێوژدانانەیە و تاوانە ل دژی جۆتیارێن بێتاوان یێن کورد ل پارێزگەها کەرکووکێ دهێتەکرن کو بتنێ تاوانا وان ئەوە کوردن و خودانێن رەسەن یێن ئەردێ خۆنە".

سەرۆک بارزانی نڤیسیە ژی "داخوازێ ژ محەمەد شیاع سوودانی، سەرۆکوەزیرێ ئیراقێ دکەم رێگریێ ل دوبارەبوونا ڤێ زۆلمێ بکەت و تاوانباران دەستەسەربکەن و ب گەهینە سزایێ یاسایی".

ل دویماهیا پەیاما خۆ سەرۆک بارزانی دبێژیت "دەستخۆشیێ ل وان کوردێن قارەمان دکەم کو ل هەمبەر ڤێ زۆلم و ستەمێ د خۆراگربوون و بلا باش بزانن کو دبێخودان و پشت نینن و ب هەمی هێز ڤە پشتەڤانیێ ل خۆراگری و ماف و داخوازیێن وان دکەین.