دیار عەبدولعەزیز

ل قامشلۆ ئێکی خورمە دفرۆتن، هاوار دکر: وەرنە پیڤازا وەرنە پیڤازا. ئێك هات گۆتێ: کورۆ خورمە نە! وی ژی گۆت: هش.. دەینەکە ژ ترسا مێشا!

ئەڤ سحبەتا هۆنەرمەند سەعید گاباری، یا کو بەری سترانا "مەسئۆلێن تۆز و با" دبێژیت، ل سەر رەوشا نوکە یا حکومەتا هەرێما کوردستانێ دهێت، هەر چ تشتێ ب خێروبێرە کو مافێ خەلکی و هەژارانە، حکومەت یا وان خزمەتگۆزارییان ب کۆمپانی دکەت، دبێژن ئەڤ کۆمپانییە ژی هەر یێن کەسێن دەستهەلاتدار و دار و دەستەکا وانن. ل دووڤ کۆمپلێکسا گاباری؛ کارێن حکومەتێ خورمەنە و کۆمپانی ژی مێشن! مێشبوونا کۆمپانییان ژی ب دیراسەت و ب هەبوونا راوێشکارێن مووچە-چەور، دیسان ب هەبوونا میدیایێن جەماوەرخوازە یێن کو دەوسێ ژ هرچێ گرنگتر لێ دکەن، یێن کو ل جەم وان مژوولکرن بەری هشیارکرنا جڤاکی دهێت. ئەڤە هەمی داکو نیازێن بەرژەوەندخوازان و پێنگاڤێن کۆمپانی و دەستهەلاتداران ب موزایەدەیێن نشتمانی و نەتەوەییی بهێنە پیرۆزکرن، پاشی هەر چ رەخنە و زانینە دێ ب تێکدان و دەستێن دەرەکی هێنە ناڤکرن.

حکومەتەکا هێشتا بێهنا دو ئیدارییێ ژێ بهێت، حکومەتەکا د گەندەلییێ را نقۆم بوویی، نەشیا بیت ژێرخانەیەکا ئابووری یا بهێز چێکەت، فۆبیا ژ شەفافیەتێ هەبیت و داهات و رێڤەبرنێن نە زەلال بن، بگرە شیانێن دابینکرنا مووچە، خزمەتگۆزاری و سۆتەمنییێ وەکی پێدڤی نەبن. وی دەمی "ب-کۆمپانی-کرن" دهێتە وێ واتەیێ کو هەر چ کار، بەرهەم، خزمەتگۆزاری یێن کو داهات پێڤە دهێت، کو بەری نوکە خەلکی ب ساناهی ب دەست ڤە دئینان و ژێ سوودمەند دبوون،  ئەو خزمەتگۆزارییە دێ ب رێیا هندەك جهێن تایبەت هێنە کرن، کو بهایەکێ پتر ژ خەلکی دهێنە وەگرتن. بۆ نموونە؛ دەمێ کارەب ب رێیا کۆمپانییەکێ بهێتە دابینکرن، راستە دێ بیتە 24 سەعەتی، لێ دێ بهایێ وێ گەلەك پتر بیت ژ وی دەمێ حکومەتێ کارەبا نشیتمانی بەلاڤ دکر، دەرمان، پشکنین، ئاڤاکرن و ڤەگۆهاستن ژی هەروەسا، ب وێ رەوشێ گەلەك بیاڤێن دی ژی دێ هێنە قۆرغکرن، قۆرغکرنەکا بێ چاڤدێری و دووڤچوون و هەڤدەم بهاگران ژی. ئەڤە ژی مۆنۆپۆلە، ژ بەر کو ب وی حالی بازار و هەڤرکی نابن، بەلکو کۆمپانی چارچووڤەکری نە و هەما بێژە ئەو ب خۆە دێ محاسەبەیا خۆە کەن و قۆرغکارییەکا ڤەبری یە.

گەر سحبەت بەرەڤ وی ئاقاری ڤە چوو، گاڤا کو هەمبێزا "قەیرە حکومەتا ساڤا" ب وژدانا کۆنکریتی یا بازرگانان هاتە گوهۆڕین، وی دەمی بهایێ کار و بەرهەم و خزمەتگۆزارییێن گشتی دێ گەلەك گران ببن. ئەم ژ بیر نەکەین ئەو تشتێن دێ بازرگانی پێ هێنە کرن، مافێن دەستپێکی یێن ڤی مللەتێ هەژار، چەوساندی، کیمیا و ئەنفال دیتی، کۆچبەر، خەباتکار، رێنجبەر و فەرمانبەرێن مووچە نەدیارە.