دلژین سكرى – گاڤ - تایبه‌ت
نۆشداره‌ك بۆ گاڤ به‌حس ل پاراستنا پیستى دكه‌ت و دبێژیت: چاوا دێ شێی پیستێ خۆ ژ زیانێن هشکبوونێ و کێم ئاڤیێ ل هەیڤا رەمەزانا پیروز پارێزی و رێكان ژى دیاردكه‌ت.
د.لیث حازم، تایبەتمەندێ نەخۆشیێن پیستی بۆ گاڤ گۆت: ل هەیڤا رەمەزانێ و ب تایبەتی دەما رەمەزان دکەڤیتە د وەرزێ سەرمایێ دا خەلك پتر تووشی هشکبوونا پیستی دبن و گه‌له‌ك گازنده‌یان ژ هشکبوونا دەست و پێ و ناڤچاڤێن خۆ دکەن . 
لەورا داکو تووشی هشکبوونا پیستی نەبی باشترە لدویف ئەڤان رێنمایان بچی  
1- ل رۆژێن سەرما بزاڤان بكه‌ دیربکەڤە ژ سەرمایا دژوار و گەلەك شوشتنا دەستان و بکارئینانا پاقژکەران، ژبه‌ركو ئه‌و زیانێ ب پیستێ مرۆڤی دگەهینن .
2- بزاڤان بكه‌ ل وەرزێ زڤستانێ پشتی هەر دەست شوشتنەکێ شێدارکەران بکاربینە داکو تووشی هشکبوونا دەستان نەبی . 
3- گەلەك گرنگە بەردەوام کرێمێن هەتاڤێ بکاربینی بەلێ پێدڤیە کرێم لگەل جۆرێ پیستێ تە  ب گونجیت.
4- دەما شکاندنا رۆژیێ باشترە ژ ڤەخوارنا ڤه‌خوارنێن گازى و کافاینی دیر بکەڤی و ئەو ڤەخوارنێن هەستێ تێهنیبوونێ لدەف مرۆڤی په‌یدادكه‌ن . 
5- دیربکەڤە ژ خوارنێن فاست فود ، ئانکو خوارنێن تژی ژ دوهنی و خوارنێن قەلاندى.
6- هەولدە رێژەیه‌کا کێم ژ لوقمە، زەلابی و شریناهییان بخۆ چونکى ژێدەرێ دروستبوونا پرسکان شریناهینە .  
7- خوارنا رێژەکا زۆر ژ زەرزەواتی و ئاڤێ بۆ پاراستنا پیستێ تە ژ هشکبوونێ گه‌له‌ك گرنگه‌ . 
8- هەمی ئەندامێن لەشی گرێداینە ب مێشکەکێ ساخلەمڤە و داکو مێشکێ تەیێ ساخلەم بیت پێدڤیە تە خەوەکا ساخلەم و دروست هەبیت . 
9- ئەو کەسێن بەردەوام پیستێ وان یێ هشک پێدڤیە بەردەوام شێدارکەران بکار بینن لێ دیف راوێژا نۆشدارێ خۆ . 
10- ئەو کەسێن پیستێ وان سۆتی ژبەر هەتاڤێ یان تووشی تسبخاتا بووین پێدڤیە  ل رەمەزانێ پتر گرنگیێ ب پیستێ خو بدەن چونکو ئەگەر هەیە ل رەمەزانێ ژبەر کێم خوارن و ڤەخوارنێ ئەو تسباخاتە کویرتر لێ بهێن و چارەسەری ب زەحمەتر بکەڤیت .