گاڤ

سەرۆکوەزیرێ کەنەدایێ ل دۆر سەپاندنا سزایێن گومرکی یێن سەرۆکێ ئەمریکایێ ل سەر کەنەدایێ هاتە دەنگ و نەرازیبوونا خۆ دیار کر

جاستن ترۆدۆ، سەرۆکوەزیرێ کەنەدایێ ل ئۆتاوایا پایتەختێ کەنەدایێ بۆ سازیێن رۆژنامەڤانی ئاخفت و ل دۆر بریارێن ترەمپی یێن سەپاندنا سزایێن گومرکی ل سەر کەنەدایێ راگەهاند: من راستەوخۆ دڤێت ل گەل کەسەکی ل ئەمریکا بئاخڤم، دۆنالد! د سەر وێ چەندێ را کو تو زەلامەکێ ب ئاقلی، لێ کردارێن تە یێن خشیمانن و ئەڤ چەندا تە کری گەلەک یا گەمژانە یە.

ترۆدۆی هەروەسا گۆت ژی؛ ئەمریکا ئێدی شەڕی ل گەل نزیکترتن هەڤال و هەڤپشکێن خۆ دکەت.

هەروەسا گۆت ژی؛ کەنەدی ئەقلانی و ب ئەدەب و نازکن، لێ ل بەر ڤان گەفێن ترەمپی گاڤان پاشڤە ناهاڤێژن.

ترۆدۆی زێدەتر گۆت؛ دێ بەرسڤا 25٪ یا زێدەکرنا باجا گومرکی دەین و ب بهایێ 155 ملیار دۆلاران باجێ دانینە سەر کالایێن ئەمریکی و دێ د هەیاما 21 رۆژان دا ئەڤ بریارە هێتە بجهئینان.

دیار ژی کر؛ ئەز دبێژمە ئەمریکییان، مە دڤێت وەک هەڤال و هەڤپەیمان کار ل گەل ئەمریکا بکەین، لێ وە حکومەتەک هەلبژارتییە کو مە ناچار دکەت ڤێ چەندێ بکەین و ژ ئەنجاما ڤێ چەندێ گەلەک ژ هەوە دێ کارێ خۆ ژ دەست دەن و دبیت کاریگەرییێ ل کەنەدیان ژی بکەت لێ دەرگەهێ مە هەردەم یێ ڤەکرییە بۆ دانوستاندنان دا کو ڤان باجان راکەین.

دۆنالد ترەمپی بریار دایە کو ب رێژەیا 25٪ باجێ بئێخیتە سەر کالایێن مەکسیکی و کەنەدی و هزاران بازرگانێن کۆمپانییێن دروستکرنا ترومبێلان هەتا یێن بەرهەمئینانا کحولی هوشداری ژ ئیفلاسبوون و زیانێن مەزن داینە و ل دویڤ گۆتنا ترەمپی وی دڤێت ب ڤێ رێکێ فشارێ بئێخیتە سەر وان وەلاتان دا کو رێگریێ ل هاتنا کۆچبەرێن نەیاسایی بکەن بۆ ناڤ ئاخا ئەمریکا.