گاڤ

رێڤەبەرێ نڤیسینگەها راگەهاندنێ یا هەسەدێ راگەهاند: رێککەفتننامەیا هەسەدێ و دەولەتا سووریێ ئەرێنی و گرنگە و ب ناڤبەینکارییا ئەمریکا هاتییەکرن.

فەرهاد شامی، رێڤەبەرێ نڤیسینگەها راگەهاندنێ یا هێزێن سووریایا دیمۆکرات (هەسەدە) ل دۆر رێککەفتننامەیا دناڤبەرا هەسەدێ و دەولەتا سووریێ دا راگەهاند: چ گوهۆرین د هێزێن مە دا روینادەت و چ هێز بۆ ناڤچەیێن مە ناهێنە هنارتن.

شامی هەروەسا گۆت؛ ئارمانجا مە ژ ڤێ رێککەفتننامەیێ راگرتنا شەڕ و ئالۆزییانە و کەیسا داعشێ دێ هەر د دەستێ هەسەدێ دا مینیت و ئەمریکا ئالییەکێ چالاکە د ڤێ رێککەفتننامەیێ دا.

سەبارەت هاتنا هێزێن دەولەتێ بۆ رۆژئاڤایێ کوردستانێ ژی، شامی دا زانین؛ چ گوهۆرین د نەخشەیێ هێزێ دا روینادەن و دبیت هندەک هێز بهێنە هێلا سنۆری یا مە ل گەل تورکیا ل تەنەفێ.

شامی هەروەسا گۆت: چەند رۆژەکە تورکان گەلەک هێز هنارتییە دەوروبەرێن قەرەقۆزاکێ، هەروەسا رەوشا ناڤچەیێن کوردنشین یێن حەلەبێ نەباشە، ئارمانجا مە یا سەرەکی راوەستاندنا ڤان شەڕان و ڤەگەریانا خەلکێ عەفرین، سەرێکانی و گرێسپییە.

دەقێ رێککەفتننامەیا هەسەدێ و دەولەتا تورکیێ:

1. گرەنتیکرنا مافێن هەمی خەلکێ سووریێ و پشکدارییا وان د پرۆسەیا سیاسی دا ل هەمی سازیێن حکومەتێ بێی کو باگراوەندێ وان یێ ئاینی و نەتەوەیی ل بەرچاڤ بهێتە وەرگرتن.
2. جڤاکا کوردی جڤاکەکا رەسەن یا وەلاتێ سووریێ یە و دەولەتا سووریێ مافێ وان یێ وەلاتیبوونێ و دەستووری گرەنتی بکەت.
3. شەر ل هەمی دەڤەرێن سووریێ بهێتە راگرتن.
4. هەمی سازیێن سڤیل ل باکورێ رۆژهەلاتێ سووریێ تێکهەلی ئیدارەیا دەولەتێ ببن د ناڤا وان دا دەرگەهێن سنۆری، فرۆکەخانە و زەڤییێن پەترۆلێ و غازێ.
5. گرەنتیکرنا ڤەگەراندنا هەمی پەنابەرێن سووری بۆ باژێرێن وان و گرەنتیکرنا پاراستنا وان.
6. پشتەڤانیکرنا دەولەتا سووریێ د بەرهنگاربوونا چەکدارێن خۆڤەشارتی یێن سەر ب رژێما ئەسەدی ڤە و هەمی گەفێن ل سەر ئێمناهی و ئێکپارچەییێ.
7. هەمی داخوازێێن دابەشبوونێ و گۆتارێن کەربێ و بزاڤێن تێکدانێ د ناڤبەرا هەمی پێکهاتەیێن سووریێ دا بهێنە رەتکرن.
8. پێدڤییە لژنەیێن جێبەجێکار تا دویماهییا ئەڤ سالە ڤێ رێککەفتنێ بجهبینن.