گاڤ

سەرۆک بارزانی و فەرماندارێ گشتی یی هێزێن سووریا دیمۆکرات ب رێکا تەلەفۆنێ رەوشا سیاسی یا رۆژئاڤایێ کوردستانێ و سووریێ گۆتوبێژ کر.

بارەگایێ بارزانی راگەهاند: سەرۆک بارزانی و مەزلووم عەبدی ب تەلەفۆنێ ئاخفتن و هەردویان دووپاتی ل سەر وێ چەندی کر کو دڤێت بۆ گاڤێن بهێت یێن پرۆسەیا سیاسی ل سووریێ هەلویستێ کوردان ئێک بیت.

هەروەسا ئەو ژی دیار کریە: مەزلووم عەبدی هویرکاتی و دەرئەنجامێن کۆمبوونا خۆ یا ل دیمەشقێ بۆ سەرۆک بارزانی بەحسکرن.

ئەو ژی دیار کریە: دڤێت پشتەڤانییا هەر گاڤەکێ بهێتەکرن کو ببیتە ئەگەرێ ئاشتی و ئارامییێ ل سووریێ.

بەری چەند رۆژا مەزلووم عەبدی و ئەحمەد شەرع، سەرۆککۆمارێ سووریێ بۆ رەوشا ئینتیقالی کۆمبوون و رێککەفتننامەیەکا 8 خالی ئیمزاکر.

دەقێ رێککەفتنێ:

1. گرەنتیکرنا مافێن هەمی خەلکێ سووریێ و پشکدارییا وان د پرۆسەیا سیاسی دا ل هەمی سازیێن حکومەتێ بێی کو باگراوەندێ وان یێ ئاینی و نەتەوەیی ل بەرچاڤ بهێتە وەرگرتن.
2. جڤاکا کوردی جڤاکەکا رەسەن یا وەلاتێ سووریێ یە و دەولەتا سووریێ مافێ وان یێ وەلاتیبوونێ و دەستووری گرەنتی بکەت.
3. شەر ل هەمی دەڤەرێن سووریێ بهێتە راگرتن.
4. هەمی سازیێن سڤیل ل باکورێ رۆژهەلاتێ سووریێ تێکهەلی ئیدارەیا دەولەتێ ببن د ناڤا وان دا دەرگەهێن سنۆری، فرۆکەخانە و زەڤییێن پەترۆلێ و غازێ.
5. گرەنتیکرنا ڤەگەراندنا هەمی پەنابەرێن سووری بۆ باژێرێن وان و گرەنتیکرنا پاراستنا وان.
6. پشتەڤانیکرنا دەولەتا سووریێ د بەرهنگاربوونا چەکدارێن خۆڤەشارتی یێن سەر ب رژێما ئەسەدی ڤە و هەمی گەفێن ل سەر ئێمناهی و ئێکپارچەییێ.
7. هەمی داخوازێێن دابەشبوونێ و گۆتارێن کەربێ و بزاڤێن تێکدانێ د ناڤبەرا هەمی پێکهاتەیێن سووریێ دا بهێنە رەتکرن.
8. پێدڤییە لژنەیێن جێبەجێکار تا دویماهییا ئەڤ سالە ڤێ رێککەفتنێ بجهبینن.