گاڤ

وەزیرا دەرڤە یا ئەلمانیایێ راگەهاند: رێککەفتننامەیا هەسەدێ و دەولەتا سووریێ گەلەک یا گرنگە و مە کار ل سەر کربوو.

ئانالێنا بێربۆک، وەزیرا دەرڤە یا ئەلمانیا، ئانالێنا بێربۆکێ د پەیامەکێ دا راگەهاند: ئێکگرتنا هەسەدێ و حکومەتا سووریێ گاڤەکا گرنگە بۆ سووریایەکا ئێکگرتی و بێی پشکدارییا هەمی سووریان ئارامی ل وی وەلاتی دروست نابیت.

بێربۆکێ هەروەسا گۆت ژی؛ مە ژی کار ل سەر ڤێ رێککەفتننامەیێ کارکربوو، ئەم ل گەل هەڤپشکێن خۆ د حەفتییا بۆری دا ل سەر ڤی بابەتی ئاخفتبووین.

هەروەسا گۆت ژی؛ ئەم هەر رۆژ دبینین کا سووریا د چ مەترسی دا  یە، کوشتنا ب ئارمانج یا سەدان خەلکێ سڤیل تاوانە و دڤێت ب جددی بهێتە ڤەکۆلان.

بەری چەند رۆژا مەزلووم عەبدی و ئەحمەد شەرع، سەرۆککۆمارێ سووریێ بۆ رەوشا ئینتیقالی کۆمبوون و رێککەفتننامەیەکا 8 خالی ئیمزاکر.

دەقێ رێککەفتنێ:

1. گرەنتیکرنا مافێن هەمی خەلکێ سووریێ و پشکدارییا وان د پرۆسەیا سیاسی دا ل هەمی سازیێن حکومەتێ بێی کو باگراوەندێ وان یێ ئاینی و نەتەوەیی ل بەرچاڤ بهێتە وەرگرتن.
2. جڤاکا کوردی جڤاکەکا رەسەن یا وەلاتێ سووریێ یە و دەولەتا سووریێ مافێ وان یێ وەلاتیبوونێ و دەستووری گرەنتی بکەت.
3. شەر ل هەمی دەڤەرێن سووریێ بهێتە راگرتن.
4. هەمی سازیێن سڤیل ل باکورێ رۆژهەلاتێ سووریێ تێکهەلی ئیدارەیا دەولەتێ ببن د ناڤا وان دا دەرگەهێن سنۆری، فرۆکەخانە و زەڤییێن پەترۆلێ و غازێ.
5. گرەنتیکرنا ڤەگەراندنا هەمی پەنابەرێن سووری بۆ باژێرێن وان و گرەنتیکرنا پاراستنا وان.
6. پشتەڤانیکرنا دەولەتا سووریێ د بەرهنگاربوونا چەکدارێن خۆڤەشارتی یێن سەر ب رژێما ئەسەدی ڤە و هەمی گەفێن ل سەر ئێمناهی و ئێکپارچەییێ.
7. هەمی داخوازێێن دابەشبوونێ و گۆتارێن کەربێ و بزاڤێن تێکدانێ د ناڤبەرا هەمی پێکهاتەیێن سووریێ دا بهێنە رەتکرن.
8. پێدڤییە لژنەیێن جێبەجێکار تا دویماهییا ئەڤ سالە ڤێ رێککەفتنێ بجهبینن.