گاڤ

پەکەکێ راگەهاند: بلا نەڤرۆزا ئەڤسالە ببیتە نەڤرۆزا ئازادییا ئۆجەلانی و وەزیرێ بەرگریێ یێ تورکیا ژی بەرسڤ دا؛ بێێ مەرج خۆ بهەلوەشینن.

پارتییا کارکەرێن کوردستانێ (پەکەکە) د پەیامەکێ دا راگەهاند: ئەم پابەندین ب سازکرنا کۆنگرەیێ خۆ و پێدڤییە هەمی چەک بهێنە بێدەنگرکرن لێ دڤێت مە پەیوەندی ل گەل ئۆجەلانی هەبیت و بلا نەڤرۆزا ئەڤ سالە ببیتە نەڤرۆزا ئازادییا فیزیکی یا ئۆجەلانی.

پەکەکێ هەروەسا راگەهاند: بۆ دانوستاندنا نوکە جدیەت و هەستیار و ل سەرخۆبوون پێدڤییە، دڤێت فشارل تورکیا بهێنەکرن دا کو گاڤان بەرەڤ دیمۆکراسیەتێ بهاڤێژیت.

ژ لایێ خۆ ڤە یاشار گولەر، وەزیرێ بەرگریێ یێ تورکیا، جارەکا دی ژ پەکەکێ خواست خۆ بهەلوەشینیت و بێی مەرج چەکێن خۆ بێدەنگ بکەت و دبێژیت؛ ژبلی خۆهەلوەشاندنێ پەکەکێ چ بژاردەیێن دی نینن.

گولەری هەروەسا گۆت؛ پێدڤییە پەکەکە ب هەمی بالێن خۆ ڤە ل ناڤچەیێن جودا-جودا خۆ بهەلوەشینیت چونکی پشتی چل سالان گەهشتییە وێ باوەرێ کو ب 'تیرۆرێ' نەشێت بگەهیتە چ ئارمانجان، ژیانا وی ب دویماهی هاتییە و وێ ژ بلی خۆهەلوەشاندنێ چ رێک و بژاردەیێن دی نینن.

پشتی بەلاڤبوونا پەیاما ئۆجەلانی ل 27ی شوباتا سالا 2025ێ، یا کو تێدا هاتییە داخوازکرن؛ دڤێت پەکەکە کۆنگرەیێ خۆ ساز بکەت و خۆ بهەلوەشینیت، د بەرسڤا پەیاما ئۆجەلانی ژی دا پەکەکێ گۆتبوو؛ پابەندین ب گۆتنێن ئۆجەلانی.