گاڤ

سەرۆکوەزیرێ ئیراقێ راگەهاند: د چارچووڤێ پاکێجا ئێکێ دا، دێ 14 پرۆژەیێن ژێرخانە و ئاڤەدانکرنێ ل قەزا شنگال و ناڤچەیا نەینەوا ڤەکەین.

محەمەد شیاع سوودانی، سەرۆکوەزیرێ ئیراقێ ب رێکا ڤیدیۆ کۆنفرانسەکێ دەستپێکرنا هندەک پرۆژەیان ل شنگال و دەشتنا نەینەوا راگەهاندن، ل دویڤ گۆتنا وی ئەڤە رێزگرتنە ل قوربانییێن دەستێ تیرۆرێ.

سوودانی هەروەسا دیار کر: ئەڤ پرۆژەیە ب بهایێ 18 ملیار دینارانە کو پێکدهێن ژ ئاڤاکرنێ، نویژەنکرنێ و پێشخستنا رێکێن سەرەکی یێن دناڤبەرا ناحیە و گوندان دا.

سوودانی گۆت ژی؛ ئەڤ پرۆژە ب مەرەما ئاڤەدانکرنا دەشتا شنگالێ و نەینەوا و قەزا زومار و قەحتانیە کو ب دەستێن تیرۆرستێن داعشێ رویبروی هێرشەکا سیستەماتیک بووینە.

سوودانی د درێژاهییا ئاخفتنێن خۆ دا گۆت؛ ژ بەر کو خەلکێ ڤێ ناڤچەیێ ل سەردەما رژێما بەرێ یا ئیراقێ و داعشێ گەلەک قوربانی داینە، ڤێ چەندی وە ل مە کر بۆ ڤێ دەڤەرێ، هزر د دروستکرنا سندۆقەکا تایبەت دا بکەین.

ئەو ژی دیار کر: ئەم پابەندین ب ڤەگەراندنا ئاوارەیان و دروستکرنا ژیانەکا گونجایی بۆ وان و پێدڤیە دۆسیەیا وان ب دویماهی بهێت.