گاڤ

پشکنەرا گشتی یا ئەمریکا ل دۆر ئێکگرتنا هێزێن پێشمەرگەیی د راپۆرتەکێ دا دیارکریە: پشتی سەرۆک نێچیرڤان بارزانی دەستپێشخەری کری و کارنامەیا هێزێن پێشمەرگەیی پەسەندکری، پرۆسەیا ئێککرنا پێشمەرگەیی گاڤێن باش هاڤێتینە.

وەزارەتا دەرڤە یا ئەمریکا راپۆرتا خۆ یا وەرزی یا سێ هەیڤان ل دۆر کارێ هەڤپەیمانان و هێزێن ئەمریکا ل ئیراقێ، باشوور و رۆژئاڤایێ کوردستانێ بەلاڤکر.

د راپۆرتێ دا هاتییە؛ 138 هزار پێشمەرگە، دێ هێنە ڤەگوهاستن بۆ سەر وەزارتا پێشمەرگەریی و دێ بنە 11 یەکە و ل سەر دو فەرماندەییێن ناڤچەیی هێنە دابەشکرن، ئەڤە ژی پێدڤی ب پەسەندکرنا پلانەکێ یە ژ لایێ سەرۆکێ نێچیرڤان بارزانی، سەرۆکێ هەرێما کوردستانێ و مەسروور بارزانی، سەرۆکوەزیرێ هەرێما کوردستانێ ڤە.

د راپۆرتێ دا هەروەسا هاتییە: وەرگرتنا مووچەیی ب رێکا ئەلکترۆنی هاریکارە بۆ کێمکرنا گەندەلییێ و 70 هزار پێشمەرگەیێن سەر ب وەزارەتا پێشمەرگەیی ڤە ناڤێن خۆ بۆ وەرگرتنا مووچەیی ب رێکا ئەلکترۆنی، تۆمارکرینە و تنێ 17 هزار ماینە.

هەروەسا دبێژیت؛ 100٪ یا وان کەسێن کو پێدڤییە بهێنە خانەنشینکرن و ژیێ وان یێ خانەنشینییێ یە، دێ هەتا سالا 2026ێ هێنە خانەنشینکرن، یێن کو نەهاتینە خانەنشینکرن 5 هزار ژ وان یێن یەکەیا 80 و 13 هزار ژی یێن یەکەیا 70ێ نە.

هەمان راپۆرتێ بەحسی رەوشا هێزێن سووریایا دیمۆکرات ژی کریە و نڤیسیە: شەڕێ دناڤبەرا هەسەدێ و سوپایێ نیشتیمانی کو ژ لایێ تورکیا ڤە دهێتە پشتەڤانیکرن بەرفرەهتر بوویە.

هەروەسا نڤیسیە: پێشرەویێن سوپایێ نیشتیمانی وەکریە ب هزاران وەلاتییێن کورد ژ تلرفعەت و منبجێ ئاوارە ببنە ناڤچەیێن ژێر دەستهەلاتدارییا هەسەدێ.

هەروەسا نڤیسیە: بەردەوام ئەمریکایێ دانوستاندن ل گەل تورکیا و وەلاتێن دی یێن ناڤچەیێ کریە دا کو ئالۆزی کێم ببن و ئێمناهی ل ناڤچەیێ دروست ببیت.

دیسان نڤسییە: پشتی هەڕفینا رژێما بەشار ئەسەدی، مەترسییا سەرهلدانا داعشێ بەرفرەهتر بوویە و پێدڤیە ئەمریکا بۆ رێگرییا ل ڤێ چەندێ و پاراستنا ئاسایشا زیندانێن پڕ ژ چەکدارێن داعشێ و پشتەڤانییا هەسەدێ ل سووریێ بمینیت.