گاڤ

پەیڤدارێ کۆچکا سپی راگەهاند: سەرۆکێ ئەمریکا هەمی پشتەڤانی بۆ ئسرائیلێ ژبۆ دەستپیکرنا ئۆپەراسیۆنێن ئاسمانی و هشکاتی ل سەر غەززە نیشان دایە.

سپێدەها رۆژا سێشەمبییا بۆری ئسرائیلێ ژ نشکێڤە بێ ئاگەهداری هێرشی غەززە کر و ل گۆرەی دویماهی ئامارا هێرشێ 504 کەس هاتن کوشتن دهێتە گۆتن زێدەتری 190 ژ وان زارۆ بوون.

کارۆلین لیڤیت، پەیڤدارا کۆچکا سپی د بەرسڤا پسیارەکا رۆژنامەڤان دا کا ئایا ترەمپ بزاڤێن ڤەگەراندنا ئاگربەستا غەززە ددەت ئاشکرا کر: ترەمپ ب تەمامی پالپشتییێ ل گاڤێن ئسرائیلێ و هێزێن بەرگرییا وی وەلاتی دکەت کو ل چەند رۆژێن بۆری بۆ ناڤ غەززە هاڤێتین.

پەیڤدارا کۆچکا سپی گۆت ژی؛ ترەمپ ب روهنی گۆتیە ئەگەر حەماس هەمی بارمتەیان ئازاد نەکەت ب دۆزەخێ دێ باجێ دەت، ب لێبورین ڤە حەماسێ یاریکرن ب گیانێ خەلکی هەلبژارت.

دازانین ژی: رەوش ب تەمامەتی ژ بەر شاشیا حەماسێ یە، پشتی کو ل رێککەفتی 7-10-2023ێ هێرش کریە سەر ئسرائیلێ.