گاڤ

پەرلەمانێ ئیراقێ پشتی ڤەقەتیانەکا بۆ دەمێ هەیڤەکێ، ئەڤشەڤە ب سەرۆکاتییا مەحموود مەشهەدانی کۆمبوو.

فەرمانگەها راگەهاندنێ یا پەرلەمانێ ئیراقێ راگەهاند: ئەڤشەڤە ب سەرۆکاتییا مەحموود مەشهەدانی و ب بەرهەڤبوونا 170 نوونەران، کۆمبوونا پەرلەمانێ دەستپێکر.

ل گۆڕه‌ی کارنامەیا کۆمبوونێ، د کۆمبوونا ئەڤشەڤە دا پرسا سه‌ره‌كى دێ خواندنا ئێكێ بیت بۆ یاسایا خزمه‌ت و خانه‌نشینییا حه‌شدا شه‌عبی، یاسا ژ 18 مادده‌یان پێك دهێت و تێدا رێكخستنا حه‌شدا شه‌عبى، مۆله‌ت، ده‌رماله‌ و پله‌بلندكرنێ ب خۆ ڤه‌ دگریت.

هەڤدەم هەر ل گۆرەی کارنامێ، د کۆمبوونێ دا و ل گۆرەی داخوازییا وەزارەتا پەروەردێ، دێ دەنگدان ل سەر بریارا ڤەگەراندنا سیستەمێ بزاڤان هێتە دان.

مەرەم ژ بریارا ڤەگەراندنا سیستەمێ بزاڤان ژی، ئەو قوتابیێن کو ل پۆلا شەشێ ئامادەیی د وانەیەک یان دو وانان دەرنەچووی، ب دەرنەچوو ناهێنە هەژمارتن و دشێن ل سالا بهێت بێی کو دەوامێ بکەن ب تنێ پشکداریێ د ئەزموونێن دویماهییا یێن وان وانەیان بکەن.