گاڤ

خێرخوازەکێ دهۆکێ نێزیکی ملیۆن بەلگەنامەیێن فەرمی و نەفەرمی یێن گرێدایی مللەتێ کورد ڤە کرین و پێشکێشێ رێڤەبەرییا پەرتووکخانێن گشتی ل پارێزگەها دهۆکێ کرن.

مەسعوود خالد، رێڤەبەرێ پرتوکخانێن گشتی ل پارێزگەها دهۆکێ د فەیسبۆکێ خۆ دا بەلاڤکر: ب سوپاسەکا بێ سنۆر ڤە،  ب بهایێ دەهـ هزار دۆلاران نێزیکی ملیۆن بەلگەنامەیێن فەرمی و نەفەرمی یێن ئەرشیفێ ئۆسمانییان ب شێوێن (pdf  و jpeg) لدۆر وەلات و مللەتێ مە ژ ئالییێ خێرخوازەکێ دهۆکێ ڤە کو نەڤیایە ناڤێ وی بینین هاتینە کرین و گەهشتنە رێڤەبەریا مە (رێڤەبەریا پەرتووکخانێن گشتی ل پارێزگەها دهۆکێ/ پرتوکخانا بەدرخانییان).

هەروەسا نڤێسییە: وی خێرخوازی چار کۆپی ژ ڤان هەمی بەلگەنامەیان گەهاندینە دەستێ سەرۆک بارزانی و پارێزگەرێ دهۆکێ و پەرتووکخانێن گشیی یێن هەردو زانکۆیێن دهۆک و زاخۆ ژی و ب ڤێ خزینەیا پڕ بها، پرتوکخانا مە زەنگینتر و رەنگینتر لێهات.

مەسعوود خالد، هەروەسا هیڤی خواستییە نموونێن مینا وی خێرخوازی دناڤ مللەتێ مە دا مشە بن و نڤیسەر و ڤەکۆلەر ژی ب تایبەتی ئەوێن کو زمانێ تورکی و رێنڤیسا ئۆسمانییان بزانن، دێ شێن مفایەکێ باش ژ ڤان بەلگەنامەیان ببینن.

رێڤەبەرێ پەرتووکخانێن گشتی ل پارێزگەها هەروەسا ئاماژە ب وێ یەکێ ژی کریە کو ئەو بەلگەنامە تا نوکە ژ ئالیێ وان ڤە نەهاتینە خاندن لێ لدویڤ گوتنا وی خێرخوازی و ئەو جهێ لێ هاتینە کرن ژمارەیا وان نێزیکی ملیۆن بەلگەنامەیانە.