گاڤ

ئەمریکا داخوازێ ژ وەلاتییێن خۆ یێن ل سووریێ دکەت، ب زویترین دەم ژ سووریا دەربکەڤن و ئەوێن کو نە ل سووریێ ژی، نەچنە سووریێ.

بالیۆزخانەیا ئەمریکا ل دیمەشقێ د مالپەرێ خۆ دا راگەهاند: وەزارەتا دەرڤە یا ئەمریکا هوشدارییێ ددەتە وەلاتییێن ئەمریکا؛ دبیت د رۆژێن جەژن دا بالیۆزخانە، رێکخراوێن ناڤدەولەتی و سازییێن حکومی ل دیمەشقێ ب رێکا هێرشێن چەکداری و بکارئینانا بۆمب و تەقەمەنییان بهێنە ئارمانجکرن.

بالیۆزخانەیا ئەمریکا هەروەسا دبێژیت؛ گەشتێ بۆ سووریا نەکەن، مەترسییا تیرۆرێ، ئالۆزی، رەڤاندن، بارمتەگرتن، پێکدادانا چەکداری و دەستەسەرکرنێ هەیە. لەوما ژ سووریا دەربکەڤن و ژ قەرەبالغییان دویرکەڤن، هشیاربن، هەردەما رەوش تێکچۆ، خۆ د حەشارگەهان دا ڤەشێرن و موبایلێن خۆ شەحن بکەن.

ژ ئەگەرا شەڕێ ناڤخۆ یێ سووریێ، ئەڤە 13 سالە ئەمریکا کارێن بالیۆزخانەیا خۆ ل دیمەشقێ هەلاویستی و داخوازێ ژ وەلاتییێن خۆ دکەت بۆ کارێن فەر سەرا بالیۆزخانەیا چیکێ ل دیمەشقێ بکەن.