گاڤ

سەرۆکێ ئەمریکا زنجیرەیەکا باجێن گومرکی ل سەر بەرهەمێن ژمارەکا وەلاتان ل سەرانسەری جیهانێ سەپاندینە و ئەڤە دێ دیمەنێ بازرگانی یێ جیهانی گوهۆڕیت و بەرهەمێن کۆمپانیا ئەپل دێ پترین زیان ڤێ کەڤن، پشکێن وێ کۆمپانیێ ل رۆژا پێنجشەمبییێ ٪9 داکەفتن و ئەڤە خراپترین رۆژە بۆ ئەپلێ پشتی سالا 2020ێ.

تانوکە ژی پتریا مۆبایلێن ئایفۆن ل چینێ دهێنە چێکرن، ئەمریکا ب رێژەیا ٪54 باج ل سەر بەرهەمێن وی وەلاتی سەپاندیە، کۆمپانیا ئەپل دو بژاردە ل بەر دەستن، یان وێ تەحەمولا وێ خوسارەتیێ بکەت، یان بدانیتە سەر ملێن بکرێن خۆ.

ل گۆرەی رویتەرزێ، ئەرزانترین مۆبایلا ئایفۆن ب 799 دۆلاران دهێتە فرۆشتن، لێ پشتی ڤان باجان بهایێ وێ دێ گەهیتە 1142 و گرانترین ئایفۆن ژی 1599 دۆلاران دهێتە فرۆشتن و بهایێ وێ دێ گەهیتە 2300 دۆلاران.

کۆمپانیا ئەپل سالانە پتری 220 ملیۆن ئایفۆنان ل سەرانسەری جیهانی د فرۆشیت، لێ پشتی گرانبوونا بهایی، دێ زیانەکا مەزن گەهیتێ.