گاڤ

سەرۆکێ ئەمریکا و سەرۆکوەزیرێ ئسرائیلێ ل پایتەختێ ئەمریکا کۆمبوون و پشتی کۆمبوونێ کۆنفرانسەکێ رۆژنامەڤانی سازکر.

دۆنالد ترەمپ، سەرۆکێ ئەمریکا، د کۆنفرانسێ رۆژنامەڤانی دا ل دۆر کۆمبوونا ل گەل ئیرانێ راگەهاند: رۆژا شەمبییێ دێ ب رەنگەکێ راستەوخۆ ل سەر ئاستێن بلند ل گەل ئیرانێ کۆمبین و هیڤیدارین ڤان کۆمبوونان ئەنجام هەبن و ل گەل ئیرانێ رێکبکەڤین.

ترەمپی هەروەسان گۆت ژی؛ مە دووپاتی ل سەر وێ چەندێ کر کو نابیت ب چو رەنگەکی ئیران ببیتە خودانا چەکێ ئەتۆمی.

نەتەنیاهۆی ژی ل دۆر ناڤەرۆکا کۆمبوونێ گۆت: ل گەل ترەمپی رێککەفتین کو ئیران نەبیتە خودانا چەکێ ئەتۆمی.

ترەمپ و نەتەنیاهۆی بەحسی هەڤرکییێن ئسرائیل و تورکیا ل سووریێ کر و ترەمپی دا زانین؛ ئەردۆغان گەلەک یێ ب ئاقلە، ئەز و ئەو حەز ژ ئێک و دو دکەین، ئەڤە ژی مەدیایێ نەرحەت دکەت. بەری نوکە ژی من گۆتبوو؛ یا کو کەسێ نەشیایی بکەت، ئەردۆغانی کر و خەونا خۆ یا 2 هزار سالی بجهئینا. ئەگەر وی و ئسرائیلێ ئاریشەیەک هەبیت دێ بۆ چارە کەم.

نەتەنیاهۆی ژی دیار کر: پەیوەندییێن ترەمپی و ئەردۆغانی گەلەک دباشن، ئەو دشێت مە [هەردو لایان] ژ شەڕی دویر بکەت، مە نەڤێت ل گەل تورکییێ بکەڤینە شەڕی.

ل دۆر رەوشا غەززەیێ ژی ترەمپی راگەهاند: ئەگەر مە شیا غەززەیێ ژ خەلکی ڤالا بکەین، دێ ناڤێ وێ کەینە وارێ ئاشتییێ، لێ ئەز نزانم کا بۆچی ئسرائیل ژ ئاخا کۆنترۆلکری ل غەززە دەرکەفت.