فه‌وزی به‌ھجه‌ت عبدوللا

گەلەک جاران پێدڤی یە مرۆڤ ھزرا خۆ د ھەمی کاران دا بکەت و نابیت مرۆڤ دویف حەز و ڤیان و خۆشیا خۆ بکەڤیت و کاران ب ئاقلێ خۆ بکەت نەکو ب حەز و ڤیان و خۆشیا خۆ.

ئەڤ باژێرێ ئەم تێدا دژین یێ مەزنە و پڕە ژ مرۆڤان و ب دەھان ھزاران کەس تێدا دژین و ھەر خۆلەکەکێ چەندین رویدان دروست دبن، بلا مرۆڤ نەبیتە ئەگەرێ وێ چەندێ کو شێواز و قەبارێ رویدانێ مەزنتر لێ بھێت و قوربانی پەیداببن ژ ئەگەرێ رەفتارێن مرۆڤی.

ئەم ھەمی حەژێکەر و پشتەڤانێن یانا خۆ یا دھۆکین، ئەم ھەمی ب رح و گیان ڤە ل گەل یانا خۆینە و ب گشتی وەرزشێ، بەلێ نابیت ئەم چ مرۆڤان بکەینە قوربانی وێ حەژێکرنێ و جادان بگرین و وه‌لاتیان بێزار بکەین و بھێینە سەر جاددەیان و ھندەک کەسان بکەینە قوربانی کەیف خۆشیا خۆ، ب دەھان جھێن ڤالا ل ڤی باژێری ھەنە، مینا پارکا نەورۆز، پارکا ئازادی و بارزانی و جھێن ڤەکری و گەنج و لاوێن مە دشێن ل وان جھا کەیف خۆشیا خۆ دەربرن لێ گرتنا جاددێ د بیتە ئەگەرێ وێ چەندێ کو رویدان و ژ دەستدان دویفرا بھێن.

کەسەک سەربۆرا خۆ بۆ من ڤەدگوھێزیت و دبێژیت :  دایکا من جەلتا مه‌ژى لێدا ژ ئەگەرێ جاددە گرتن و ئاھەنگێن گەنجان من دایکا خۆ ژ دەست دا لێ ئەگەر من زوی گەھاندبا نەخوشخانێ دبیت ھاتبا چارەسەرکرن. ئه‌رێ پێدڤی دکەت عەزیزێن خۆ ژ دەست بدەین ژ ئەگەرێ جاددە گرتنێ ژ ئالیێ چەند گەنجان ڤە؟

بێگومان ھەر کەسەک دڤێ رەوشێ دابیت ڤێ چەندێ قەبویل ناکەت، لەورا بلا ئەم ھەمی کاودانان بینینە بەرچاڤێن خۆ و رێزێ ل ڤی باژێری و رویدانێن وان ل مرۆڤبوونێ بگرین و ھەڤکارێن ئێک بین .

دوماھیێ ژی دێ بێژم ب ئانەھیا خودێ و پشتەڤانیا خودێ و یاریزانین یانا دھۆک سەرکەفتن بۆ یانا دھۆکێ یە و پشتەڤانێن یانا خۆینە و یانا دھۆک دێ دیرۆكێ تۆمارکەت و د ناڤا یاریگەھا دھۆک دا دێ ناسناڤی بلند کەت، بەلێ ب شێوازەکێ جوان و دیری ئالۆزی و رێکگرتنێ بلا ئاھەنگ بھێنە گێڕان نەکو ببیتە ئەگەرێ وێ چەندێ کو وه‌لاتی ببنە قوربان و بێزارکەر.