گاڤ

ل رۆژێن بهێت دانوستاندن دناڤبەرا ئەمریکا و ئیرانێ دا، ل وەلاتێ سییێ  دێ هێنە کرن، دانوستاندن دێ ل دۆر سنۆردارکرنا بەرنامەیا ئەتۆمی بیت نە ژناڤبرنا وێ. هەروەسا مووشەکێن دویر هاڤێژ و گرۆپێن میلیشیایێن سەر ب ئیرانێ ڤە تەوەرەکێ دی یێ کۆمبوونێ یە.

بریارە ل رۆژا شەمبی، 2025-04-12، دانوستاندن دناڤبەرا ئەمریکا و ئیرانێ دا ل وەلاتێ سییێ (عوممانێ) بهێنە کرن. ئەڤە ژی بۆ هندێ یە بگەهنە رێککەفتنێن دبلۆماسی و رێگرییا ژ هێرشێن سەربازی. ئەمریکا دبێژیت؛ ئەڤ دانوستاندنە دێ د راستەوخۆ بن و ئیران رەت دکەت و دبێژیت؛ دێ نە د راستەوخۆ بن.

دۆنالد ترەمپ، سەرۆکێ ئەمریکا، راگەهاند؛ ئەڤە دویماهی دەلیڤەیە کو ئەم د دانینە بەر سینگێ ئیرانێ و ئەگەر رێککەفتن نەهاتە کرن، دێ مەترسییەکا مەزن رویدەت.

د بەرانبەر دا مەسعوود پزشکیان و عەباس عەراقچی، وەزیرێ دەرڤە ییێ ئیرانێ دا دیارکرن؛ دانوستاندن دێ ب شێوەکێ نەراستەوخۆ بن.

عەراقچی هەروەسا گۆت ژی؛ ئەگەر ئەمریکا بڤێت ل مەسقەتێ بگەهیتە رێککەفتنێ، تەپە د گۆرەپانا وێ دا یە.

هەروەسا چەند بەرپرسەکێن ئیرانێ بۆ ئاژانسا رویتەرزێ دایە  دیارکرن؛ ئەم ب گومان ڤە سەرەدەرییێ ل گەل هەر پێشهاتەکێ دکەین و مە باوەری ب پێشڤەچوونان نینە.

ل سالا 2013ـێ، کۆمبوونەکا نهێنی دناڤبەرا بەرپرسێن ئەمریکا و ئیرانێ دا ل عوممانێ هاتبوو کرن. ئەڤ کۆمبوونە ب سەرپەرشتییا هەردو سەرۆک وەزیران جۆن کێری، محەمەد جەواد زەریفی، د بەردەوام بوون هەتا کو سالا 2015ـێ.

ل چریا ئێکێ یا سالا 2024ـێ، عەراقچی، وەزیرێ دەرڤە یێ ئیرانێ، راگەهاند بوو؛ نوکە چو ژینگەهێن گونجایی بۆ رێککەفتنێ نینن.

هەروەسا ل نیسانا سالا 2025ـێ ژی، ترەمپی راگەهاند؛ مە نیاز هەنە ل گەل ئیرانێ ب شێوەکێ راستەخۆ ل مەسقەتێ ل دۆر بەرنامەیێ ئەتۆمی کۆم ببین، لێ د بەرانبەر دا؛ ئیران دبێژیت دانوستاندن دێ ب شێوەکێ نە راستەوخۆ بن.