گاڤ

سەرۆکوەزیرێ ئسرائیلێ، د کۆمبوونا شەڤا بۆری یا ل گەل سەرۆکێ ئەمریکایێ دا، دوپاتی ل هندێ کر کو نابیت ئیران ببیتە خودانا چەکێ ئەتۆمی، ژ بەر کو ئسرائیل پرۆگرامێ ئەتۆمی یێ ئیرانێ وەک مەترسى ل سەر ئاساییشا خۆ دبینیت، ئەڤرۆ ژی تەکەزی ل سەر هەلویستێ خۆ یێ شەڤا بۆری کر و راگەهاند: ئەگەر رێککەفتن نەهێتەکرن، دێ شەڕ رویدەت.

سەرۆکوەزیرێ ئیسرائیلێ، بنیامێن نەتەنیاهۆ، دوپاتى ل هندێ کر کو ژبۆ پاراستنا قەوارەیێ خۆ ژ گەفێن ئیرانێ ئەو دێ هەر رێیەکێ گریتە بەر و گۆت؛ ب چاڤدێرییا ئەمریکا دێ وەستگەهێن ئیرانێ پەقینین و هەمی کەلوپەلێن وان ژناڤبەین.

هەروەسان نەتەنیاهۆیی، ل دۆر  تورکیییێ گۆت ژی؛ ئەنقەرەیێ ل بەرە بنگەهێن سەربازی ل سووریایێ بدانیت، ئەڤە ژی دبیتە ئەگەرێ مەترسییێ بۆ سەر ئاساییشا مە. ئەڤجا دێ ل دژی ڤێ چەندێ کار کەین.

ل دۆر غەزە سەرۆکوەزیرێ ئسرائیلێ گۆت ژی؛  ئەم د رژدین ل سەر ژناڤبرنا حەماسێ و ڤەگەراندنا بارمتە یێن خۆ.

هەروەسان سەرۆک وەزیرێ ئیسرائیلێ، بنیامێن نەتەنیاهۆ دا دیارکرن؛ سەرەدانا من بۆ کۆچکا سپی گەلەک یا باش و گەرموگور بوو، هندەک تشت ماینە پاش دێ بینین.

د بەرسڤا گۆتنێ نەتەنیاهۆیی یێن ل دۆر ئیرانێ، عەباس عەراقچی، وەزیرێ دەرڤە یێ ئیرانێ، دا دیارکرن؛ ل عومانێ و ل رۆژا شەمبی دێ دانوستاندنان ل گەل ئەمریکا ب شێوەکێ نەراستەخۆ کەین.

عەراقچی هەروەسا گوت ژی؛ ئیرانێ چو بزاڤەک نەکرییە کو چەکێ ئەتۆمی دروست بکەت، دا کو گاڤێن باش بهێنە هاڤێتن یا باش ئەوە (بژاردەیا سەربازی) بدانینە لایەکی.

ئەڤە ژی پشتی وێ چەندێ یە کو دو دلی یا وەلاتان ل دۆر پرۆگرامێ ئەتۆمی یێ ئیرانێ زێدەتر بوویە. ئەو ل وێ باوەرێنە کو ئیران بەردەوام کار ل سەر پیتاندنا رێژەیا یۆرانیومی دکەت هەتا کو بگەهیتە ئاستێ چەکێ ئەتۆمی.