گاڤ

سەرۆک بارزانی پیرۆزباهییا جەژنا سەرسالا ئێزدییان دکەت و د پەیامەکێ دا دبێژیت؛ دڤێت ئێزدی ب خۆ بریارێ ل سەر چارەنڤیسێ خۆ بدەن

ئەڤرۆ، سێ شەمبییێ، 15-04-2025، ب هەلکەفتا هاتنا جەژنا سەرێ سالا ئێزدییان، سەرۆک مەسعوود بارزانی، پەیامەک بەلاڤکر و راگەهاند: هیڤیدارم دویماهی ب ژان و ئاوارەیی و نەهامەتییێن ئێزدییان بهێت.

سەرۆک بارزانی نڤیسییە: ب هەلکەفتا هاتنا جەژنا سەرێ سالا ئێزیدیان، پیرۆزباهییەكا گەرم ل هەمی خویشك و برایێن ئێزدی ل كوردستانێ و جیهانێ دكەم و هیڤییا خۆشی و ئارامییێ بۆ وان دخوازم.

سەرۆکی هەروەسان گۆتییە: هەر ب ڤێ هەلكەفتێ هیڤیخوازم دویماهی ب ژان و ئاوارەیی و وان نەهامەتیان بھێت كو ژ ئالییێ تیرۆرست و نەحەزێن گەلێ مە ب سەر وان دا هاتیە سەپاندن و خویشك و برایێن ئێزدی ب سەربەستی و ئازادی بزڤرنە لـ سەر جھـ و وارێ خۆ و بۆ ڤێ چەندێ پێدڤیە هەمی ئالییەک هەڤكار بن كو کوردێن ئێزدی بخۆ بڕیارێ ل سەر چارەنڤیس و پاشەڕوژا خۆ بدەن و  ماف و كۆلتوور و نەریتێت وان بهێنە پاراستن و برینێن وان بهێنە سارێژ كرن.

سەرۆکی ئەو ژی دیارکرییە؛ هیڤیدارم هەمی جەژن و هەلکەفتێن هەوە ب شادی و ئارامی دەرباز ببن و هیڤیا ساڵەكا پڕ خێر و بەرەكەت و بمینن د خێر و خۆشیان دا.

چارشەمبا سەرێ نیسانێ، سەرێ سالا ئێزدییانە کو ئێکەم چارشەمبێن مەها نیسانێ، بۆ کوردێن ئێزدی دبیتە جەژن و ل دویڤ هزروبیرێن ئێزدییان جیهان د ڤێ رۆژێ دا دروستبوویە و سروشت رەنگین بوویە. لەوما ب ڤێ هەلکەفتێ هێکان رەنگ دکەن و ل دویڤ هندەک ژێدەران، دیرۆکا ڤێ جەژنێ کەڤنە و د ناڤ ئایینێ میتراییان ژی دا هەبوویە.